Ayon sa ulat ng Korean Central News Agency (KCNA), pinatnubayan Huwebes, Hulyo 25, 2019 ni Kim Jong-un, Kataas-taasang Lider ng Hilagang Korea (DPRK) ang paglulunsad ng bagong tactical guided weapon. Pero hindi binanggit ng nasabing ulat ang konkretong uri o pangalan ng naturang sandata.
Anang ulat, ang kasalukuyang paglulunsad ng bagong sandata ay babala sa pamahalaan ng Timog Korea sa plano nitong papasukin ang sulong na sandata sa pagsalakay at isagawa ang pagsasanay-militar. Umaasa ang DPRK na babalik sa lalong madaling panahon ang panig Timog Koreano sa komong palagay na narating sa mga pagtatagpo ng mga lider ng dalawang bansa noong Abril at Setyembre ng nagdaang taon.
Nagpulong Huwebes ang National Security Office ng Timog Korea, at ayon sa pag-aanalisa sa pulong, ang inilunsad ng DPRK ay "bagong short range ballistic missile." Ipinahayag ng panig Timog Koreano na ang kilos ng DPRK ay hindi makakatulong sa pagpapahupa ng maigting na kalagayang militar ng Korean Peninsula.
Sinabi naman nang araw ring iyon ni Mike Pompeo, Kalihim ng Estado ng Estados Unidos, na gumagawa ang iba't ibang panig ng paghahanda para sa talastasan. Nananalig aniya siyang malulutas ng Amerika at DPRK ang mga problema, sa pamamagitan ng diplomatikong talastasan, at inaasahang isasagawa ng kapuwa panig ang pagsasanggunian sa loob ng darating na ilang linggo.
Salin: Vera