Lumagda kahapon, Miyerkules, ika-7 ng Agosto 2019, sa Singapore, ang 46 na bansang kinabibilangan ng Tsina, Amerika, Timog Korea, Indya, Singapore, Malaysia, Iran, Israel, at iba pa, sa United Nations Convention on International Settlement Agreements Resulting from Mediation o tinatawag ding Singapore Convention on Mediation. Sila ang mga bansang unang lumagda sa kombensyong ito.
Ang Singapore Convention on Mediation ay pinagtibay noong Disyembre 2018 ng Pangkalahatang Asembleya ng UN. Layon nitong pasulungin ang pagpapatupad ng mga kasunduan hinggil sa paglutas sa mga pandaigdig na hidwaang komersyal na narating sa pamamagitan ng medyasyon. Ito ay makakatulong sa pagpapalakas ng papel ng medyasyon.
Sa kani-kanilang pahayag kaugnay ng paglagda sa kombensyon, sinabi nina Punong Ministro Lee Hsien Loong ng Singapore at Pangkalahatang Kalihim Antonio Guterres ng UN, na ipinakikita nito ang kahalagahan ng multilateralismo at bukas na posisyon ng iba't ibang bansa sa negosyo, kalakalan, at pamumuhunan.
Salin: Liu Kai