Sinabi kahapon, Miyerkules, ika-7 ng Agosto 2019, sa Beijing, ni Wang Chunying, Tagapagsalita ng State Foreign Exchange Administration ng Tsina, na walang katwiran ang pagtuturing ng Amerika sa Tsina na "currency manipulator," at taliwas ito sa kapwa tuntunin at katotohanan. Ang aksyong ito rin aniya ay magdudulot ng negatibong epekto sa kapaligiran ng kabuhayan at kalakalan ng buong daigdig, at hahadlang sa paglaki ng kabuhayang pandaigdig.
Sinabi ni Wang, na nauna rito, ginawa minsan ng Amerika ang pamantayan kung paano itakda ang isang bansa bilang "currency manipulator," batay sa mga malinaw na estadistika. Pero aniya, sa kasalukuyang pagtatakda ng Amerika sa Tsina bilang currency manipulator, hindi nito ginamit ang nabanggit na pamantayan at sa halip, ginamit ang isang naunang batas na binalangkas noong 1988, at wala itong konkretong pamantayan sa pagtatakda sa isang bansa bilang currency manipulator.
Sinabi rin ni Wang, na ang pagbaba kamakailan ng palitan ng RMB kontra sa US Dollar ay resulta ng reaksyon ng pamilihan sa paglala ng alitang pangkalakalan ng Tsina at Amerika at bagong plano ng Amerika ng pagpataw pa ng karagdagang taripa sa mga panindang Tsino. Samantala, ani Wang, sinabi ng Tesorarya ng Amerika na ang hindi panghihimasok ng Tsina sa pagbaba ng halaga ng RMB ay pagmamanipula sa salapi. Ito ay balighong pahayag, dagdag niya.
Salin: Liu Kai
