Nitong nakalipas na ilang panahon, dahil sa pagsasagawa ng Amerika ng unilateralismo, at pagpapalala ng alitang pangkalakalan sa Tsina, nakakaranas ng kaligaligan ang pandaigdig na pamilihang pinansyal. Sa ilalim ng pagbabago ng suplay, pangangailangan, at ekspektasyon sa pamilihan, bumaba kamakailan ang palitan ng RMB kontra sa US Dollar, at ngayon ay nasa mas mababa sa 7 yuan RMB kada isang dolyar.
Ang naturang normal na reaksyon ng pamilihan ay sinamantala ng panig Amerikano bilang pagkakataon. Taliwas sa mismong tuntunin at katotohanan, itinuturing ng Amerika ang Tsina bilang "currency manipulator." Layon nitong ibayo pang patawan ng presyur ang Tsina sa isyu ng kalakalan, at tugunan ang pangangailangang pulitikal sa loob ng Amerika.
Sa katotohanan, sapul nang isagawa noong 1994 ng Tsina ang reporma sa mekanismo ng pagbuo ng exchange rate ng RMB, gumaganap ang pamilihan ng higit na malaking papel sa pagbabago ng palitan ng RMB. Sa pinakahuling regular na pagtasa sa kalagayan ng kabuhayan ng Tsina na ginawa ng International Monetary Fund noong Hunyo ng taong ito, ipinalalagay nitong, ang paghawak ng Tsina ng palitan ng salapi nito ay angkop, sa pangkalahatan, sa mga elementong pangkabuhayan. Samantala, sa nagdaang limang kalahating taunang ulat sa loob ng administrasyon ni Donald Trump, hindi naman itinuring ng Tesorarya ng Amerika ang Tsina bilang currency manipulator.
Ang kasalukuyang pagtuturing ng Amerika sa Tsina na "currency manipulator" ay lilikha ng bagong hadlang sa pag-unlad ng relasyong pangkabuhayan at pangkalakalan ng dalawang bansa. Ito rin ay magdaragdag ng kaligaligan sa pandaigdig na pamilihang pinansyal, at magdudulot ng negatibong epekto sa pag-ahon ng pandaigdig na kabuhayan at kalakalan. Sinabi naman ni Lawrence Summers, dating Kalihim ng Tesorarya ng Amerika, na hindi makatwiran ang pagtuturing ng Amerika sa Tsina na "currency manipulator." Ito aniya ay makakapinsala sa kredibilidad ng pamahalaang Amerikano at magdudulot ng panganib ng resesyong pangkabuhayan sa bansang ito.
Salin: Liu Kai
