Ayon sa pinakahuling datos na isinapubliko Huwebes, Agosto 8, 2019 ng Pangkalahatang Administrasyon ng Adwana ng Tsina, noong unang pitong buwan ng kasalukuyang taon, umakyat sa mahigit 17.4 trilyong Yuan, RMB ang kabuuang halaga ng pag-aangkat at pagluluwas ng kalakalang panlabas ng Tsina. Ito ay mas malaki ng 4.2% kumpara sa gayunding panahon ng nagdaang taon. Nananatiling matatag ang tunguhin ng paglaki ng kalakalang panlabas ng bansa.
Ayon sa nasabing datos, lumaki ang pag-aangkat at pagluluwas ng Tsina sa mga pangunahing pamilihang tulad ng Unyong Europeo (EU), Association of Southeast Asian Nations (ASEAN), at Hapon. Mas malaki kaysa pangkalahatang lebel ang bahagdan ng paglaki ng pag-aangkat at pagluluwas ng Tsina sa mga bansa sa kahabaan ng "Belt and Road." Noong unang pitong buwan, ang EU ay nagsisilbing pinakamalaking trade partner ng Tsina na umabot sa 2.72 bilyong Yuan ang kabuuang halaga ng kalakalang Sino-Europeo. Ang ASEAN naman ay nagsisilbing ikalawang pinakamalaking trade partner ng Tsina na 2.35 trilyong Yuan ang kabuuang halaga ng kalakalang Sino-ASEAN.
Salin: Lito