Isang editoryal ang ipinalabas kahapon, Huwebes, ika-8 ng Agosto 2019, ng pahayagang Wall Street Journal ng Amerika, na nagsasabing ang maling patakarang pangkalakalan ng administrasyon ni Pangulong Donald Trump ay posibleng magdulot ng resesyong pangkabuhayan sa bansa.
Ayon sa editoryal, sapul nang palalain noong 2018 ng Amerika ang alitang pangkalakalan sa ibang mga bansa, humina ang kompiyansa ng mga kompanyang Amerikano at bumaba ang kanilang paggastos. Anang editoryal, ito ay nagdudulot ng negatibong epekto sa pag-unlad ng kabuhayang Amerikano. Sa kasalukuyan, ang paglaki ng kabuhayan ay bumaba sa 2% mula sa halos 3% nauna rito, at ang karaniwang buwanang bilang ng mga bagong hanapbuhay ay bumaba rin sa 165 libo, mula sa 223 na libo noong 2018, dagdag ng editoryal.
Sinabi rin ng editoryal, na nananatiling mababa ang lebel ng deposito sa Amerika, dahil dito, kailangang angkatin ng bansa ang kapital mula sa labas, at ang pag-aangkat ng kapital ay nangangahulugan ng trade deficit. Pero, mukhang hindi napagtatanto ni Trump ang pinag-uugatang sanhing ito na nagresulta sa hindi pagbuti ng kalagayan ng trade deficit ng Amerika, anang editoryal.
Pinuntuhan din ng naturang editoryal ang hinggil sa plaktuwasyon ng palitan ng RMB, salaping Tsino kontra sa US Dollar. Anito, ang pagpataw ng Amerika ng karagdagang taripa sa mga panindang Tsino ay nagresulta sa pagbaba ng pangangailangan ng pamilihan sa RMB, samantala, ang pagbili ng pandaigdig na kapital ng US Dollar para iwasan ang panganib ay nagresulta sa pagtaas ng halaga ng salaping ito. Kaya, ang pagbabago ng palitan ng RMB ay dahil sa relasyon ng suplay at pangangailangan sa pamilihan, sa halip na manipulasyon di-umano ng Tsina, diin ng editoryal.
Salin: Liu Kai
