Ayon sa pinakahuling datos na ipinalabas kamakailan ng Tsina, noong unang pitong buwan ng taong 2019, lumaki nang 8.7% ang added-value ng industriya ng hay-tek na manupaktura ng bansa, kumpara sa gayunding panahon ng 2018. Kasabay nito, tumaas ng 11.1% at 11.9% ang puhunan sa industriya ng hay-tek na manupaktura at hay-tek na serbisyo, ayon sa pagkakasunod. Ipinakikita nitong sa kabila ng masalimuot na kalagayang pandaigdig, ang industiya ng hay-tek ay nagsisilbing bagong lakas-panulak sa pagpapasulong ng de-kalidad na pag-unlad ng kabuhayang Tsino.
Bilang ikalawang pinakamalaking ekonomiya sa daigdig, naaangkop ang Tsina sa bagong round ng rebolusyong pansiyensiya't panteknolohiya ng daigdig, at walang humpay na nagpapasulong ng inobasyon, para maisakatuparan ang mas episyente at sustenableng pag-unlad.
Noong 2018, ang added-value ng bagong industriya at serbisyo ay katumbas ng 16.1% ng Gross Domestic Product (GDP) ng bansa, na mas mataas ng 0.3% kumpara sa taong 2017. Samantala, lumampas sa 2/3 ang ambag ng nasabing mga bagong industriya at serbisyo sa bagong oportunidad ng trabaho. Ayon sa pinakahuling Global Innovation Index ng World Intellectual Property Organization (WIPO), nahahanay ang Tsina sa ika-14 na puwesto, at nangunguna sa daigdig sa mga aspekto na gaya ng bilang ng patente, orihinal na tatak at disenyong industriyal, pagluluwas ng mga produktong hay-tek at inobatibo, at iba pa.
Upang mahikayat ang pambansang inobasyon at mapabilis ang aplikasyon ng mga bagong bungang panteknolohiya, nitong ilang taong nakalipas, inilabas ng Tsina ang serye ng preperensyal na patakaran hinggil sa buwis, pinansya, venture capital, pagtutulungang pandaigdig, at iba pa.
Nakakalungkot naman sa proseso ng pag-unlad ng Tsina, madalas na napapakinggan ang pagdududa mula sa mga bansang Kanluranin. Kapag mabilis ang pag-unlad ng kabuhayan ng Tsina, maririnig ang pananalita ng banta mula sa Tsina, at habang umaandar ang kabuhayan ng Tsina sa makatwirang saklaw, may mga pananalita na gaya ng pagbagsak ng kabuhayan ng Tsina. Walang kabutihang dulot sa anumang bansa o sa daigdig ang nasabing pagdungis sa Tsina.
Kahit nahaharap ang Tsina sa presyur ng pagbaba ng kabuhayang dulot ng alitang pangkalakalang inilunsad ng Amerika, walang tigil na nagsisikap ang Tsina para mapasulong ang de-kalidad na pag-unlad at magbigay ng mas maraming oportunidad para sa buong daigdig.
Salin: Jade
Pulido: Mac
