Bilang tugon sa kaguluhan ng Hong Kong nitong ilang araw na nakalipas, walang-humpay na ipinahayag ng iba't ibang sektor ng Hong Kong ang kani-kanilang pagkatig sa pamahalaan ng Espesyal na Rehiyong Administratibo ng Hong Kong (HKSAR) para maibalik sa normal ang kabuhayan at lipunan ng rehiyon, sa lalong madaling panahon.
Malalakas na hakbangin ng pagpapalago ng kabuhayan
Ayon sa pinakahuling datos na ipinalabas ng pamahalaan ng HKSAR, noong unang hati ng taong 2019, dahil sa kawalang-katiyakang panlabas at mahinang pangangailangang panloob, umabot lamang sa 0.55% ang paglaki ng Gross Domestic Product (GDP) ng Hong Kong. Ito ang pinakamahinang kilos ng kabuhayan ng Hong Kong sapul noong 2009. Bilang tugon, isasagawa ng pamahalaan ng HKSAR ang iba't ibang hakbangin na nagkakahalaga ng 19.1 bilyong Hong Kong dollar para suportahan ang mga kompanya, panatilihin ang employment rate at mapagaan ang pasanin ng pamumuhay ng mga mamamayan. Sinabi kamakailan ni Carrie Lam Cheng Yuet-ngor, Punong Ehekutibo ng HKSAR na nakipagtagpo siya sa mga kinatawan ng iba't ibang sektor ng Hong Kong, at magpapalabas ng malalakas na hakbangin sa Ulat ng Pangangasiwa ng HKSAR sa darating na Oktubre.
Itigil ang karahasan at bumalik sa normal ang lipunan
Ipinalalagay ng iba't ibang sektor ng Hong Kong na ang karahasang ginawa ng mga radikal ay nakakapinsala sa pangangasiwa ayon sa batas, kaayusang panlipunan, kabuhayan, pamumuhay ng mga mamamayan, at imahe ng Hong Kong sa mundo. Diin nila, upang makaalpas sa kasalukuyang kahirapan at maibalik sa normal ang operasyong pangkabuhayan, ang pinakapangkagipitang dapat gawin ng Hong Kong ay itigil ang lumalalang kaguluhan.
Pagkabalaha ng mga kabataan, malulutas lamang sa pamamagitan ng kaunlaran
Ang patuloy na mabilis na pag-unlad ng kabuhaya't lipunan ng Chinese mainland ay nagkakaloob ng sustenableng lakas-panulak at malaking espasyo para sa kaunlaran ng Hong Kong. Ang mga pambansang estratehiya na gaya ng Belt and Road Initiative (BRI) at Guangdong-Hong Kong-Macao Greater Bay Area ay nakakatulong sa pagpapatingkad ng Hong Kong ng bentahe at papel nito sa pambansang kaunlaran. Sa proseong ito, maaari ring matamo ng mga kabataan ng Hong Kong ang mas malawak na plataporma para lumaki kasabay ng pag-unlad ng inang-bayan.
Ipinahayag ng mga kinatawan ng iba't ibang sektor ang pag-asang mabibigyan ang mga kabataan ng Hong Kong ng mas maraming oportunidad, sa proseso ng pagpapasulong ng pag-a-upgrade ng kabuhayan ng Hong Kong, at pagpapahigpit sa pakikipagtulungan sa Chinese mainland at daigdig.
Sinabi naman ni Lam na ang mga kabataan ay pag-asa ng kinabukasan ng bansa, at sa hinaharap, magiging mas matiyaga ang pamahalaan ng HKSAR para makipag-ugnayan sa lahat ng mga kabataan at mapakinggan ang kanilang tinig.
Salin: Jade
Pulido: Mac
