Nitong Sabado, Agosto 31, 2019, ilegal na nagrali at nagsagawa ng marahas na aksyon ang mga radikal na raliysta sa maraming lugar ng Hong Kong. Kaugnay nito, ipinahayag nang araw ring iyon ng isang tagapagsalita ng pamahalaan ng Espesyal na Rehiyong Administratibo ng Hong Kong (HKSAR) na buong tinding kinokondena ng pamahalaan ng HKSAR ang paglala ng mga ilegal at marahas na aksyon ng mga radikal na raliysta. Aniya, tiyak at mahigpit na iimbestigahan ng panig kapulisan ang mga ito.
Sinabi ng nasabing tagapagsalita na ang mga marahas na aksyon ay grabeng sumisira sa katahimikang panlipunan, at nagdudulot ito ng napakalaking banta sa kaligtasan ng mga mamamayan at kapulisan ng Hong Kong. Aniya pa, patuloy na pangangalagaan ng pamahalaan ng HKSAR ang pangangasiwa alinsunod sa batas, at muli siyang nananawagan sa mga residente na manatiling malayo sa mga marahas na aksyon para mapanumbalik ang kaayusang panlipunan sa lalong madaling panahon.
Salin: Lito