Nakipagtagpo kahapon, Huwebes, ika-12 ng Setyembre 2019, sa Beijing, si Pangalawang Premyer Liu He ng Tsina, kay Evan Greenberg, Tagapangulo ng U.S.-China Business Council (USCBC).
Kaugnay ng pahayag ng Amerika hinggil sa pagpapaliban ng pagpataw ng karagdagang taripa sa mga panindang Tsino na nakatakdang isagawa sa unang araw ng darating na Oktubre, ipinahayag ni Liu ang pagtanggap ng panig Tsino. Sinabi rin niyang, sa susunod na linggo, isasagawa ng dalawang panig ang pagtatagpo sa working level, para magpalitan ng palagay hinggil sa balanseng kalakalan, market access, pangangalaga sa mga mamumuhunan, at iba pang isyu. Inaasahan ng buong daigdig ang pagtamo ng progreso ng pagsasangguniang pangkalakalan ng Tsina at Amerika, dagdag ni Liu.
Sinabi naman ni Greenberg, na ayaw makita ng sirkulo ng industriya at komersyo ng Amerika ang pagdaragdag ng taripa. Ipinahayag din niya ang pag-asang lulutasin ng Amerika at Tsina ang pagkakaiba sa pamamagitan ng pagsasanggunian, at panunumbalikin ang normal na pagpapalagayan sa kabuhayan at kalakalan.
Salin: Liu Kai