Ipinadala Linggo, Oktubre 6, 2019 nina Xi Jinping, Pangkalahatang Kalihim ng Komite Sentral ng Partido Komunista ng Tsina (CPC) at Pangulo ng bansa, at Kim Jong-un, Tagapangulo ng Korean Workers Party, ang mensahe sa isa't-isa bilang pagdiriwang sa ika-70 anibersaryo ng pagkakatatag ng relasyong diplomatiko ng dalawang bansa.
Sa mensahe, ipinahayag ni Xi na nitong 70 taon na nakararaan, pormal na naitatag ng Tsina at Hilagang Korea ang relasyong diplomatiko. Ito aniya ay may mahalagang katuturan sa kasaysayan ng relasyon ng dalawang partido. Ani Xi, nitong 70 taong nakalipas, natamo ng pagpapalitan at pagtutulungang Sino-Hilagang Koreano ang kapansin-pansing bunga sa iba't-ibang larangan, bagay na nakakapagpasulong nang malaki sa kanilang usaping sosyalista at nakakapagpatingkad ng mahalaga at positibong papel sa pangangalaga sa kapayapaan at katatagang panrehiyon.
Dagdag pa ni Xi, nakahanda ang Tsina na sa okasyon ng ika-70 anibersaryo ng pagkakatatag ng relasyong diplomatiko ng dalawang bansa, patuloy na magsikap kasama ng Hilagang Korea para mapasulong ang malusog at matatag na pag-unlad ng relasyong Sino-Hilagang Korea at makapagbigay ng mas malaking benepisyo sa dalawang bansa at kanilang mga mamamayan.
Sa kanya namang mensahe, ipinahayag ni Kim Jong-un na buong tinding iginigiit ng kanyang bansa ang pagkakaibigang Hilagang Koreano-Sino para maisakatuparan ang komprehensibong pag-ahon ng relasyong pangkaibigan at pangkooperasyon ng dalawang bansa. Ito aniya ay buong tatag at di-nagbabagong posisyon ng partido at pamahalaang Hilagang Koreano.
Salin: Lito