Ipininid kagabi, Miyerkules, ika-9 ng Oktubre 2019, ang Beijing International Horticultural Exhibition.
Sa kanyang talumpati sa seremonya ng pagpipinid, sinabi ni Premyer Li Keqiang ng Tsina, na sa ilalim ng temang "Live Green, Live Better," itinanghal sa eksibisyong ito ang mga maunlad na teknolohiya sa larangan ng mundong hortikultural, at ipinakikita nito ang kagandahan ng maharmonyang pakikipamuhayan ng sangkatauhan at kalikasan.
Ipinahayag din ni Li, na habang pinapaunlad ang kabuhayan, lubos ding pinapalakas ng Tsina ang pangangalaga sa ekolohiya at kapaligiran, para isakatuparan ang sibilisadong pag-unlad, na may maunlad na kabuhayan, mabuting pamumuhay ng mga mamamayan, at mainam na ekolohiya. Aniya pa, patuloy at aktibong lalahok ang Tsina sa pandaigdig na kooperasyon sa pagharap sa pagbabago ng klima, at nakahanda rin itong tulungan ang mga umuunlad na bansa sa pagpapasulong ng green economy.
Sa seremonya ng pagpipinid, ipinahayag naman nina Vicente Loscertales, Pangkalahatang Kalihim ng Bureau of International Expositions, at Bernard Oosterom, Presidente ng International Association of Horticultural Producers, ang pagbati sa matagumpay na pagdaraos ng Beijing International Horticultural Exhibition. Hinahangaan din nila ang mga natamong bunga ng Tsina sa pangangalaga sa ekolohiya at kapaligiran.
Salin: Liu Kai
