Washington D.C. — Magkakahiwalay na kinatagpo Miyerkules ng hapon, Oktubre 9 (local time), 2019, ni Liu He, Kagawad ng Pulitburo ng Komite Sentral ng Partido Komunista ng Tsina (CPC) at Pangalawang Premyer ng bansa, sina Craig Allen, Puno ng US-China Business Council, Myron Brilliant, Pangalawang Puno ng US Chamber of Commerce, at Kristalina Georgieva, bagong halal na Presidente ng International Monetary Fund (IMF).
Sa kanyang pakikipagtagpo kina Allen at Brilliant, ipinahayag ni Liu na napakahalaga ng relasyong pangkabuhayan at pangkalakalan ng Tsina at Amerika, at mayroong itong malaking impluwensiya sa buong daigdig. Aniya, ang trade war ng Tsina at Amerika ay hindi nakakabuti, hindi lamang sa Tsina at Amerika, kundi sa buong mundo. Nakahanda ang panig Tsino na magsikap kasama ng panig Amerikano para mapasulong ang pagtatamo ng positibong progreso ng talastasan, dagdag niya.
Ipinahayag naman ng panig Amerikano na walang sinumang nananalo sa trade war, at tutol ang sirkulong industriyal at komersyal sa tariff hike. Umaasa silang mahahanap ng dalawang panig ang mabuting kalutasan sa pagtigil ng trade war. Nakahanda ang sirkulong industriyal at komersyal ng Amerika na patingkarin nito ang positibong papel, dagdag pa nila.
Sa kanya namang pakikipagtagpo kay Georgieva, ipinahayag ni Liu ang kahandaan ng panig Tsino na, sa pundasyon ng pagkakapantay at paggagalangan sa isa't-isa, magsikap kasama ng panig Amerikano para magkasundo ang dalawang panig sa ilang isyung kapwa nila binibigyang-pansin. Umaasa aniya siyang magkakasamang magsisikap ang komunidad ng daigdig upang mapangalagaan ang katatagan at kasaganaang pandaigdig.
Ipinahayag naman ni Georgieva ang lubos na paghanga ng IMF sa determinasyon at katapatan ng panig Tsino sa paglutas sa isyu sa pamamagitan ng pagsasanggunian. Nakahanda aniya ang IMF na patuloy na patingkarin ang karapat-dapat na papel sa aspekto ng pangangalaga sa sistemang multilateral at malayang kalakalan.
Salin: Lito
