Kaugnay ng pagpapadala ngayong araw, Huwebes, ika-17 ng Oktubre 2019, ni Punong Ministro Shinzo Abe ng Hapon ng abuloy sa Yasukuni Shrine, at pagbibigay-galang naman doon ng ilang miyembro ng gabinete at parliamento ng naturang bansa, sinabi nang araw ring iyon ni Geng Shuang, Tagapagsalita ng Ministring Panlabas ng Tsina, na ito ay negatibong aksyon ng panig Hapones sa isyu ng Yasukuni Shrine. Nagharap na aniya ang panig Tsino ng solemnang representasyon sa panig Hapones.
Dagdag ni Geng, ang Yasukuni Shrine ay simbolo ng paglulunsad ng mga militaristang Hapones ng digmaang mapanalakay sa ibang mga bansa noong World War II, at nakadambana doon ang mga kriminal ng naturang digmaan. Aniya, muling ipinakikita ng kasalukuyang mga aksyon ng mga opisyal na Hapones ang maling pakikitungo ng Hapon sa kasaysayan ng pananalakay nito.
Salin: Liu Kai