Nagtagpo nitong Huwebes, Nobyembre 21, sa Beijing sina Peng Liyuan, Unang Ginang ng Tsina at goodwill ambassador ng World Health Organization (WHO) para sa tuberculosis (TB) at HIV/AIDS, at Bill Gates, co-chair ng Bill & Melinda Gates Foundation.
Ipinahayag ni Peng ang mataas na pagtasa sa epektibo at mabungang pagtutulungan sa pagitan ng Bill & Melinda Gates Foundation at Tsina. Higit sa lahat, hinangaan ni Peng ang progresong natamo sa mga proyektong suportado ng pundasyon sa pagpigil at pagkontrol sa HIV/AIDS at pagkakaloob ng mas mabuting alagang pangkalusugan sa mahihirap na mamamayan sa Liangshan Yi Autonomous Prefecture, Sichuan, lalagiwan sa dakong timog-kanluran ng Tsina.
Dagdag pa ni Peng, ang pagkakaloob ng mas mabuting serbisyong pangkalusugan ay isa sa mga masusing hakbang ng Tsina para mapahupa ang karalitaan. Kaya, ipinahayag niya ang pag-asang patuloy na suportahan ito ng Bill & Melinda Gates Foundation
Ipinahayag naman ni Gates ang mataas na pagkilala sa kamangha-manghang bungang natamo ng Tsina sa pagpapahupa ng kahirapan sa larangan ng pangangalaga sa kalusugan, at ibinigay na ambag ng bansa sa pagpapasulong ng pandaigdig na kooperasyon at sustenableng pag-unlad.
Ang pagpapahigpit ng kooperasyon sa pagitan ng Amerika at Tsina ay makakabuti sa mga mamamayan ng dalawang bansa at buong daigdig, saad ni Gates.
Ipinahayag din ni Gates ang kahandaan ng kanyang pundasyon na palakasin ang pakikipagtulungan sa Tsina sa larangan ng alagang-pangkalusugan, pagpapahupa ng karalitaan, at kapakanang pampublikio , at pagbibigay-tulong sa iba pang mga umuunlad na bansa sa larangan ng kaunlarang pangkalusugan at pang-agrikultura.
Salin: Jade
Pulido: Mac
