Pinagtibay kamakailan ng Kongreso ng Amerika ang Hong Kong Human Rights and Democracy Act. Nakikialam ito sa suliraning panloob ng Tsina, nagbibigay-suporta sa mga radikal, at nanunulsol ng kaguluhan sa Hong Kong. Ipinakikita rin nito ang hegemonismo at power politics ng Amerika, na matagal na tinututulan ng komunidad ng daigdig.
Ang kasalukuyang mga aksyon ng panig Amerikano sa isyu ng Hong Kong ay pinupuna rin ng iba't ibang panig. Halimbawa, tinukoy ni Robert Kuhn, ekspertong Amerikano sa isyu ng Tsina, na ang karahasan ay hindi dapat katigan ng anumang bansa, at ang nabanggit na panukalang batas ay masama sa Amerika, Tsina, at maging sa daigdig. Ipinahayag naman ni Abbas Mousavi, Tagapagsalita ng Ministring Panlabas ng Iran, na ang ganitong aksyon ng Amerika ay labag sa pandaigdig na norma, at grabe itong nakakapinsala sa katatagan ng buong mundo. Tinukoy naman ni Sultan Mahmud Ghazi, Presidente ng Afghanistan-China Friendship Association, na alam na alam ng mga Afghani ang grabeng resultang dulot ng karahasan, at kahit sa alinmang pangangatwiran, hindi dapat suportahan ng Amerika ang karahasan sa Hong Kong.
Dapat buong taimtim na pakinggan ng panig Amerikano ang ganitong tinig ng komunidad ng daigdig, at agarang itigil ang pagbibigay-suporta sa karahasan sa Hong Kong sa pamamagitan ng anumang porma. Kung hindi, ito ay labag sa pandaigdig na batas at saligang norma ng relasyong pandaigdig, masama sa sariling reputasyon ng Amerika, at tiyak na tututulan ng Tsina.
Salin: Liu Kai