Sinabi kahapon, Lunes, ika-2 ng Disyembre 2019, sa Beijing, ni Pangulong Xi Jinping ng Tsina, na lubos na pabor ang panig Tsino sa pananalita ni Pangulong Vladimir Putin ng Rusya, na maling mali ang pakikialam ng ilang bansang kanluraning gaya ng Amerika sa mga suliraning panloob ng Rusya at Tsina.
Winika ito ni Xi sa kanyang pakikipagtagpo kay Nikolai Patrushev, Security Council Secretary ng Rusya. Binigyang-diin niyang sa pamamagitan ng interbensiyon, tangka ng ilang bansang kanluranin na bantaan ang soberanya at seguridad ng Tsina at Rusya, at hadlangan ang pag-unlad ng dalawang bansa. Pero ani Xi, nananalig siyang walang anumang puwersa ang makasasagabal sa landas pausad ng Tsina at Rusya.
Sinabi naman ni Patrushev, na ang kasalukuyang mga patakaran ng Amerika ay nakakapinsala sa mga kapakanan ng Rusya at Tsina, at nagdudulot din ng negatibong epekto sa pandaigdig na sistema at kaayusan. Dapat aniyang palakasin ng Rusya at Tsina ang koordinasyon, para pangalagaan ang soberanya at seguridad ng dalawang bansa, at panatilihin ang estratehikong katatagan ng daigdig.
Salin: Liu Kai