Nakipagtagpo nitong Huwebes, Disyembre 5, 2019 sa Beijing si Wang Qishan, Pangalawang Pangulo ng Tsina, sa mga kinatawang kalahok sa ika-12 sesyong plenaryo ng China-Russia Friendship Committee for Peace and Development (CRFCPD).
Tinukoy ni Wang na ang kasalukuyang taon ay ika-70 anibersaryo ng pagkakatatag ng relasyong diplomatiko ng Tsina at Rusya, at nasa pinakamagandang lebel sa kasaysayan ang bilateral na relasyon. Aniya, ang nasabing komite ay mahalagang plataporma ng diplomasyang di-pampamahalaan ng dalawang bansa. Dapat aniyang gawing patnubay ang mahalagang komong palagay na narating ng mga lider ng dalawang bansa, gawing misyon ang pagpapasulong sa pagkakaibigang di-pampamahalaan ng kapuwa panig, walang humpay na palakasin ang pagpapalitan, at patibayin ang pundasyon ng mithiin ng mga mamamayan para sa pagtatatag ng komprehensibo, estratehiko't kooperatibong partnership ng Tsina at Rusya sa bagong panahon.
Salin: Vera