Ayon sa Customs Tariff Commission ng Konseho ng Estado ng Tsina, sinuspinde ng bansa ang mga karagdagang taripa sa mga produktong Amerikano na nakatakdang ipataw, 12:01 p.m. (Beijing Time), ngayong araw, Linggo, ika-15 ng Disyembre 2019.
Kabilang sa mga nabanggit ay 10% at 5% na karagdagang taripa sa nagkakaibang uri ng mga produkto mula sa Amerika. Samantala, patuloy na suspendido ang karagdagang taripa sa mga sasakyan at piyesa ng sasakayang yari ng Amerika.
Ayon sa naturang komisyon, ginawa ang desisyong ito, para ipatupad ang bunga ng pinakahuling pagsasanggunian sa isyu ng kabuhayan at kalakalan ng Tsina at Amerika. Ito ay alinsunod sa mga batas at regulasyon ng Tsina, at mga pundamental na prinsipyo ng pandaigdig na batas.
Kasabay nito, patuloy na ipinapataw ang iba pang mga karagdagang taripa sa mga produktong Amerikano, at patuloy na isinasagawa ang tax exemption para sa mga produktong aangkatin mula sa Amerika.
Umaasa rin ang panig Tsino, na batay sa pagkakapantay-pantay at paggagalangan, magkasamang magsisikap ang Tsina at Amerika, para maayos na lutasin ang mga pangunahing pagkabahala ng isa't isa, at itaguyod ang matatag na relasyong pangkabuhayan at pangkalakalan ng dalawang bansa.
Salin: Liu Kai
