Kaugnay ng pagyao ni Sultan Qaboos bin Said ng Oman, nagpadala nitong Linggo, Enero 12, 2020 ng mensahe si Pangulong Xi Jinping ng Tsina bilang pakikiramay kay bagong Sultan Haitham bin Tariq al-Said.
Sa ngalan ng pamahalaan, mga mamamayang Tsino at kanyang sarili, ipinahayag ni Xi ang pakikidalamhati sa pagyao ni Sultan Qaboos, at taos-pusong pakikiramay sa mga kapamilya at mga mamamayan ng Oman.
Dagdag ni Xi, bilang kaibigan ng mga mamamayang Tsino, gumawa si Sultan Qaboos ng positibong ambag para sa pagpapaunlad ng estratehikong partnership ng dalawang bansa, pagpapasulong sa pragmatikong kooperasyon ng kapuwa panig sa iba't ibang larangan, at pagpapahigpit ng pagkakaibigan ng kani-kanilang mga mamamayan. Aniya, pinahahalagahan ng pamahalaan at mga mamamayang Tsino ang pagkakaibigan ng Tsina at Oman. Nananalig aniya siyang sa ilalim ng magkasamang pagsisikap ng magkabilang panig, tiyak na matatamo ng nasabing estratehikong partnership ang bagong progreso.
Salin: Vera