Sa ulat ng World Economic Outlook na inilabas nitong Lunes, Enero 20, 2020 ng International Monetary Fund (IMF), pinataas nito ang pagtaya sa paglago ng kabuhayang Tsino. Kaugnay nito, sinabi nitong Martes sa Beijing ni Tagapagsalita Geng Shuang ng Ministring Panlabas ng Tsina na nagpapakita ito ng pagkilala ng komunidad ng daigdig sa kalagayan ng kabuhayang Tsino, at kompiyansa nila sa prospek ng kabuhayang Tsino.
Ayon sa nasabing ulat, pinababa ng IMF ang pagtaya sa paglago ng kabuhayang pandaigdig sa kasalukuyang taon at susunod na taon sa 3.3% at 3.4%. Samantala, pinataas nito ang pagtanaw sa paglago ng kabuhayang Tsino sa kasalukuyang taon sa 6%.
Diin ni Geng, kahit dumarami ang mga panganib at hamon sa loob at labas ng bansa, hindi nagbabago ang mabuting pundasyong ekonomiko ng Tsina para sa pangmalayuang paglago. Aniya, sa 2020, patuloy na pag-uukulan ng Tsina ng pansin ang supply-side structural reform, at aktibong pasusulungin ang pagpapatupad ng iba't ibang patakaran at hakbangin, para mapanatili ang paglago ng kabuhayan sa katamtaman at mataas na bilis.
Salin: Vera