Nag-usap sa telepono ngayong araw, Biyernes, ika-7 ng Pebrero 2020, sina Pangulong Xi Jinping ng Tsina at Pangulong Donald Trump ng Amerika hinggil sa epidemiya ng novel coronavirus (2019-nCoV).
Binigyang-diin ni Xi, na isinasagawa ng Tsina ang pinakakomprehensibo at pinakamahigpit na mga hakbangin bilang pagpigil at pagkontrol sa sakit na ito. Mayroon aniyang kompiyansa at kakayahan ang Tsina, na pagtagumpayan ang epidemiya, at hindi rin magbabago ang tunguhin ng mainam na pag-unlad ng kabuhayang Tsino.
Sinabi rin ni Xi, na batay sa pagsasaalang-alang sa kaligtasan at kalusugan ng mga mamamayan hindi lamang ng Tsina, kundi rin ng buong daigdig, napapanahong ipinapaalam ng Tsina sa World Health Organization at mga bansa at rehiyong kinabibilangan ng Amerika ang hinggil sa kalagayan ng epidemiya.
Pinapurihan ni Xi ang pagbibigay ni Trump ng positibong pagtasa sa mga gawain ng Tsina laban sa epidemiya, at pinasalamatan din ang iba't ibang sirkulo ng Amerika sa pagkakaloob ng mga tulong sa Tsina. Umaasa aniya siyang isasagawa ng panig Amerikano ang mahinahong pagtasa sa kalagayan ng epidemiya, at itatakda ang mga makatwirang katugong hakbangin. Kailangang panatilihin ng Tsina at Amerika ang pag-uugnayan at palakasin ang pagkokoordina, para magkasamang labanan ang epidemiya.
Ipinahayag naman ni Trump ang pagsuporta ng Amerika sa pakikibaka ng Tsina sa epidemiya ng novel coronavirus. Ipinakikita aniya ng Tsina ang namumukod na kakayahan sa pag-oorganisa at pag-responde bilang tugon sa mga pangkagipitang pangyayari. Ipinahayag din ni Trump ang kompiyansa sa pagtatagumpay ng Tsina kontra sa sakit, at pag-unlad ng kabuhayang Tsino.
Nagpalitan din ng palagay ang dalawang lider hinggil sa pagpapatupad ng unang yugto ng kasunduan sa kabuhayan at kalakalan. Ipinahayag din nila ang kahandaang magkasamang pasulungin ang relasyon ng dalawang bansa tungo sa tumpak na landas.
Salin: Liu Kai
