Tinukoy nitong Martes, Pebrero 11, 2020 ni Tagapagsalita Geng Shuang ng Ministring Panlabas ng Tsina, na ang pananalita kamakailan ni Mike Pompeo, Kalihim ng Estado ng Amerika tungkol sa Tsina, ay nagbabalewala sa kasaysayan at katotohanan ng relasyong Sino-Amerikano. Puno aniya ng mentalidad na "Cold War" at may pagkiling na pulitikal ang mga sinabi ni Pompeo, at buong tindi itong tinututulan ng panig Tsino.
Ani Geng, sa sandaling nanumbalik ang Tsina at Amerika ang relasyong diplomatiko, malinaw nilang nabatid na magkaiba ang sistemang pulitikal ng dalawang bansa. Ito ang dahilan kung bakit ipinagdiinan sa Tatlong Magkasanib na Komunike ng Tsina at Amerika na dapat palagiang igalang ang isa't-isa, di panghimasukan ang mga suliraning panloob ng isa't-isa, at pantay na pakitunguhan ang isa't-isa.
Sinabi niya na nitong mahigit 40 taong nakalipas sapul nang mapanumbalik ang relasyong diplomatiko ng Tsina at Amerika, bamaga't nakakaranas ng paggalaw ang relasyon ng dalawang bansa, umuunlad pa sa kabuuan ang kanilang relasyon, bagay na nakakapaghatid ng aktuwal na kapakanan sa mga mamamayan ng dalawang bansa, at malakas na nakakapagpasulong sa kapayapaan, katatagan, at kasaganaan ng rehiyong Asya-Pasipiko at buong daigdig. Ito aniya ay di-mapapabulaanang katotohanan.
Salin: Lito