Sinabi kahapon, Biyernes, ika-14 ng Pebrero 2020, ni Tedros Adhanom Ghebreyesus, Direktor Heneral ng World Health Organization (WHO), na inaasahang darating ng Tsina sa loob ng dalawang araw ang mga nalalabing miyembro ng grupo ng mga ekspertong pandaigdig na ipinadala ng WHO.
Ani Ghebreyesus, magiging 12 ang kabuuang bilang ng mga ekspertong itinalaga ng WHO, at bubuuin nila, kasama ng 12 ekspertong Tsino, ang magkasanib na grupo. Ang misyon nila ay pagkakaloob ng mga impormasyon sa Tsina at ibang mga bansa para sa paglaban sa epidemiya ng novel coronavirus pneumonia (COVID-19), lalung-lalo na sa mga aspekto ng pagkalat ng virus, mga sintomas ng sakit, mga pangmalayuang hakbangin laban sa epidemiya at iba pa, dagdag ni Ghebreyesus.
Ipinahayag din niya ang malasakit sa kalagayan ng pagkahawa ng sakit ng mga tauhang medikal na Tsino na nakikibaka sa epidemiya. Ani Ghebreyesus, nakikipag-ugnayan ang WHO sa mga supplier, para unahin ang pagkakaloob ng mga pang-indibiduwal na kagamitang pamproteksyon sa mga tauhang medikal ng iba't ibang may kinalamang bansa na nasa bungad ng o nangunguna sa paglaban sa epidemiya.
Salin: Liu Kai