Beijing, Tsina—Nag-usap nitong Martes, Marso 17, 2020 sina Pangulong Xi Jinping ng Tsina at kasalukuyang dumadalaw na Pangulong Arif-ur-Rehman Alvi ng Pakistan.
Diin ni Xi, sa kasalukuyan, sumisiklab ang epidemiya ng Corona Virus Disease 2019 (COVID-19) sa maraming lugar ng daigdig. Dapat aniyang magkakapit-bisig na puksain ng iba't ibang bansa ang epidemiya.
Nakahanda aniya ang panig Tsino na gumawa ng mas maraming ambag para pigilan ang pagkalat ng epidemiya sa buong mundo, at patuloy na magkaloob ng suporta't tulong sa panig Pakistani.
Saad ni Xi, kahit anumang pagbabago ang maganap sa daigdig, sa mula't mula pa'y kinakatigan ng Tsina ang Pakistan. Aniya, dapat aktibong pasulungin ng kapuwa panig ang kooperasyon sa mahahalagang larangan at proyekto, at itatatag ang ekonomikong koridor ng dalawang bansa bilang modelo ng de-kalidad na pag-unlad ng Belt and Road. Dapat din aniyang palakasin ang pag-uugnayan at pagkokoordinahan sa mga suliraning panrehiyon at pandaigdig, at magkasamang pangalagaan ang kapayapaan, katatagan at kaligtasan ng rehiyon, maging ng buong mundo.
Sinabi naman ni Alvi na sa harap ng kalamidad, ang karanasan at kilos ng Tsina ay nagsilbing kapaki-pakinabang modelo ng ibang bansa. Aniya, ang tangka ng iilang puwersa na dungisan at ibukod ang Tsina, sa pamamagitan ng epidemiya ay taliwas sa mithiin ng mga mamamayan, at tiyak itong mabibigo. Nakahanda aniya ang Pakistan na panatilihin ang mahigpit na pakikipagpalitan sa panig Tsino, palalimin ang kooperasyon, at itatag ang ekonomikong koridor ng Tsina at Pakistan.
Pagkatapos ng pag-uusap, magkasamang sumaksi ang dalawang lider sa paglagda ng mga dokumento ng bilateral na kooperasyon. Magkasama rin nilang inilabas ang magkasanib na pahayag tungkol sa pagpapalalim ng all-weather strategic cooperative partnership ng Tsina at Pakistan.
Salin: Vera
