Ngayong araw, Abril 4 ay Qingming Festival o Tomb Sweeping Day, tradisyonal na kapistahang Tsino. Sa okasyong ito, maraming Tsino ang nagbibigay-galang at naglilinis ng libingan ng mga yumao sa kani-kanilang tahanan. Sa kasalukuyang espesyal na panahon ng pagpigil at pagkontrol sa Corona Virus Disease 2019 (COVID-19), magkakasunod na ginagamit ng mga mamamayang Tsino sa iba't-ibang lugar ang mga sibilisado at luntiang porma para alalahanin ang kanilang pumanaw na kamag-anakan.
Upang mapatatag ang natamong bunga ng pagpigil at pagkontrol sa epidemiya, sa kasalukuyang taon, puspusang itinataguyod ng Tsina ang off-site tomb sweeping ways na tulad ng online o cloud tomb sweeping, pag-alala sa mga yumao sa bahay, at pagsasagawa ng serbisyo ng pagpapalinis ng libingan.
Ayon sa resulta ng pagsusuri, lampas sa 90% ng mga respondents ang sumasang-ayon sa pagpapatigil ng on-site tomb sweeping sa panahon ng Pestibal ng Qingming. Ipinalalagay nila na dapat iwasan ang pagtitipun-tipon ng mga tao sa kasalukuyang kalagayang epidemiko.
Para sa mga tao na talagang kailangang magkaroon ng on-site tomb sweeping, pormal na pinasimulan noong Marso 19 ng Departamento ng Suliraning Sibil ng Beijing ang reservation system para magkaloob ng reservation service sa paglilinis ng mga tao ng libingan. Layon nitong iwasan ang malawakang pagtitipun-tipon ng mga tao at paliitin ang panganib ng pagkalat ng virus.
Salin: Lito
