Inilabas nitong Lunes, Mayo 4, 2020 sa website ng Nature, iginagalang na science journal sa daigdig, ang resulta ng pananaliksik ng mga grupong pansiyensiya mula sa maraming bansang kinabibilangan ng Britanya, Tsina at Amerika. Sa pamamagitan ng modeling, natuklasan ng mga mananaliksik na ang tatlong non-pharmaceutical interventions (NPIs) ay hindi lamang mabisang pumigil sa pagkalat ng Coronavirus Disease 2019 (COVID-19) pandemic sa Tsina, kundi nagwagi rin ng oras para makapaghanda ang buong mundo sa banta ng pandemiya.
Tinukoy ng nasabing pananaliksik na kung hindi isinagawa ang naturang NPIs, posibleng lumaki ng 67 ulit ang kaso ng COVID-19 sa loob ng Tsina.
Ang nasabing pananaliksik ay ginawa ng mga grupo ng pananaliksik mula sa University of Southampton ng Britanya, Fudan University ng Tsina, Wuhan Center for Disease Control and Prevention, Harvard Medical School at Johns Hopkins Bloomberg School of Public Health ng Amerika, at iba pa.
Anang pananaliksik, ang NPIs ay mahalagang bahagi ng pagharap sa epidemiya ng kalusugang pampubliko. Isinagawa ng Tsina ang tatlong uri ng NPIs, kabilang ang limitasyon sa paglalakbay sa pagitan ng mga lunsod, pagkilala at pagkuwarantina ng mga kaso sa maagang panahon, at limitasyon sa kontak ng mga tao at social distancing.
Ipinakikita ng resulta ng nasabing pananaliksik na mabisang napigilan ng mga NPIs ang pagkalat ng pandemiya ng COVID-19 sa Tsina, naiwasan ang paglitaw ng mas masamang kondisyon, at napabagal ang bilis ng pagkalat ng virus sa buong mundo.
Salin: Vera
