Isang liham para kay Tedros Adhanom Ghebreyesus, Direktor Heneral ng World Health Organization (WHO) ang inilabas nitong Lunes, Mayo 18, 2020, ni Pangulong Donald Trump ng Amerika sa kanyang social media account.
Binalaan ni Trump si Ghebreyesus na kung hindi isasagawa ng WHO ang malaking substansyal na reporma sa loob ng 30 araw, permanenteng ititigil ng Amerika ang pagbibigay-pondo sa WHO, at isasaalang-alang ang pagkalas sa organisasyong ito.
Kaugnay nito, noong nagdaang buwan maaalalang sinabihan ng panig Amerikano ang WHO na ito ay nagpabaya sa pagpigil sa epidemiya, at dahil sa pangangatuwirang ito, pansamantalang itinigil ng Amerika ang pagkakaloob ng pondo sa WHO.
Ang nasabing liham ang pinakahuling palabas ng Amerika kaugnay ng walang-patid na pagbabaling ng sisi sa iba.
Sa kabilang dako, sa katatapos na Ika-73 World Health Assembly (WHA), magkakasunod na ipinagdiinan ng Pangkalahatang Kalihim ng United Nations (UN) at lider ng maraming bansa na gaya ng Alemanya at Pransya ang buong tatag na suporta sa WHO.
Diin nila, ngayon ang panahon para sa pagbubuklud-buklod, sa halip na pagbatikos o pagsira sa multilateral na kooperasyon.
Samantala, hayagang ipinatalastas ng Unyong Europeo (EU) ang pagdaragdag ng pondo sa WHO.
Kahit magulo ang proseso ng pagpigil at pagkontrol sa COVID-19 pandemic sa Amerika, at abalang-abala pa rin ang mga pulitikong Amerikano sa paghahanap ng katwiran para pagtakpan ang kanilang kamalian at walang-patid na ibaling ang sisi sa iba.
Ang ganitong nakakadiring kilos ay hindi lamang magpapasidhi sa imoralidad ng kasalukuyang administrasyon ng Amerika, kundi makakasira rin sa pagtitiwalaan at komong palagay ng komunidad ng daigdig.
Salin: Vera
