Nagpadala ng mensahe sa isa't isa, ngayong araw, Linggo, ika-5 ng Hulyo 2020, sina Pangulong Xi Jinping ng Tsina at Pangulong Nana Addo Dankwa Akufo-Addo ng Ghana, bilang pagdiriwang sa ika-60 anibersaryo ng pagkakatatag ng relasyong diplomatiko ng dalawang bansa.
Binigyan ni Xi ng mataas na pagtasa ang matatag na relasyon at mabungang kooperasyon ng Tsina at Ghana, lalung-lalo na ang kanilang pagsusuportahan at pagtutulungan sa harap ng Coronavirus Disease 2019 (COVID-19).
Ipinahayag din ni Xi ang kahandaan ng Tsina, kasama ng Ghana, na palalimin ang kooperasyon sa loob ng balangkas ng Belt and Road Initiative at Porum sa Kooperasyong Sino-Aprikano, at ibigay ang ambag sa pagtatatag ng mas mahigpit na komunidad ng pinagbabahaginang kinabukasan ng Tsina at Aprika.
Sinabi naman ni Akufo-Addo, na kapansin-pansin ang bunga ng kooperasyon ng dalawang panig at mahigpit din ang pagpapalagayan sa mataas na antas.
Umaasa aniya siyang patatatagin pa ng dalawang bansa ang pagkakaibigan, palalakasin ang koordinasyon, at palalalimin ang kooperasyon.
Dagdag ni Akufo-Addo, ang pagsuporta at pagtulong ng Tsina sa iba't ibang bansang kinabibilangan ng Ghana sa paglaban sa COVID-19 ay hinahangaan ng komunidad ng daigdig.
Salin: Liu Kai
