Sa pamamagitan ng video link, nitong Sabado, Hulyo 11, 2020, nagtipun-tipon ang 45 eksperto at iskolar mula sa Tsina at 10 bansa sa Gitnang Silangan para talakayin ang pagpapalalim ng pagpapalitan at pagtutulungan sa gitna ng Corona Virus Disease 2019 (COVID-19) pandemic.
Malalimang tinalakay ng mga kalahok ang dalawang temang kinabibilangan ng kooperasyon ng Tsina at mga bansa sa Gitnang Silangan sa pakikibaka laban sa epidemiya, at prospek ng kooperasyon ng dalawang panig sa post-epidemic era.
Sa kanyang talumpati sa seremonya ng pagbubukas, sinabi ni Xie Fuzhan, Puno ng Chinese Academy of Social Sciences (CASS), na dahil sa pagkalat ng COVID-19 sa buong daigdig, batid ng mga mamamayan ng iba't-ibang bansa na ang tanging paraan para mapawi ang kahirapan ay pagtutulungan at magkakasamang pakikibaka.
Samantala, ipinahayag din ni Zhai Jun, Espesyal na Sugo ng Pamahalaang Tsino sa Gitnang Silangan, na ang epidemiya ay hindi lamang hamon, kundi isa rin itong pagkakataon.
Aniya, kasabay ng pagpapasulong ng panunumbalik ng produksyon at trabaho, dapat walang humpay ding hanapin ng dalawang panig ang mga bagong porma at paraan para mapalakas ang estratehikong pag-uugnayan at pragmatikong kooperasyon.
Ipinahayag naman ng mga dayuhang iskolar na sa mahalagang oras ng pagharap ng buong sangkatauhan sa krisis, mas kailangan ang pagkakapit-bisig at pagpapalakas ng kooperasyon ng Tsina at mga bansa sa Gitnang Silangan.
Salin: Lito
