Isinapubliko kamakailan ng Canadian British Columbia Supreme Court ang court files na isinumite ng legal team ni Meng Wanzhou, Chief Financial Officer (CFO) ng Huawei Company.
Ayon sa nasabing mga materiyal, sinadya ng Amerika na ipunin ang kahina-hinalang ebidensya laban kay Meng para makasuhan ng bank fraud, ang naturang mga ebidensya ay ginamit upang sadyaing iligaw ng panig Amerikano ang pamahalaan at hukumang Kanadyano.
Kaugnay nito, ipinahayag sa Beijing nitong Lunes, Hulyo 27, 2020 ni Tagapagsalita Wang Wenbin ng Ministring Panlabas ng Tsina, na ang mga naibunyag na ebidensya ng hukuman ng Kanada ay lubos na nagpapakitang ang insidente ni Meng Wanzhou ay isang napakaseryosong insidenteng pulitikal na niluto ng panig Amerikano para atakehin at pigilin ang pag-unlad ng high-tech enterprises ng Tsina at Huawei Company.
Ani Wang, sa katotohanan, ginagamit lamang ng Amerika ang Kanada. Kapalit ang kapakanan ng mga mamamayang Kanadyano, naglilingkod ang Kanada para sa hangaring pulitikal ng iilang politikong Amerikano at kapakanang komersyal ng mga kompanyang Amerikano, dagdag pa niya.
Salin: Lito