Sa pamamagitan ng video link, idinaos nitong Lunes, Agosto 24, 2020 ang Ika-3 Pulong ng mga Lider ng Lancang-Mekong Cooperation (LMC).
Sa kanyang talumpati sa pulong, iniharap ni Premyer Li Keqiang ng Tsina ang mga mungkahi sa 6 na aspektong kinabibilangan ng pagpapalakas ng kooperasyon sa yamang tubig, pagpapalawak ng kooperasyon ng kalakalan at konektibidad, pagpapalalim ng kooperasyon sa sustenableng pag-unlad, pagpapalakas ng kooperasyon sa larangan ng pamumuhay ng mga mamamayan, at pagpapatupad ng ideya ng pagbubukas at inklusibidad. Layon nitong aktibong makatulong sa maayos na pagharap ng mga bansa sa Ilog Lancang-Mekong sa mga panganib at hamon at maisakatuparan ang komong kaunlaran.
Kalakip sa "Vientiane Declaration" na isinapubliko pagkatapos ng pulong, ang mga mungkahi ng panig Tsino. Idineklara ng mga kalahok na palalakasin ang kanilang partnership ng kooperasyong pampulitika at panseguridad, kooperasyon sa kabuhayan at sustenableng pag-unlad, pagpapalitang pangkultura at panlipunan, at mekanismo ng LMC.
Walang duda, binibigyang-kasiglahan nito ang pag-unlad ng kooperasyon ng mga bansa sa Ilog Lancang-Mekong sa hinaharap, at binibigyan din nito ng direksyon ang pagtatatag ng mas matibay na komunidad ng pinagbabahaginang kapalaran ng nasabing mga bansa sa "post-pandemic era."
Ang LMC ay isang bagong sub-rehiyonal na mekanismong pangkooperasyon na magkakasamang tinatalakay, itinatatag, at tinatamasa ng 6 na bansa sa Ilog Lancang-Mekong. Matapos ang mahigit 4 taong pag-unlad, nakuha ng mekanismong ito ang marami at matibay na bunga sa mga larangang gaya ng agrikultura, pagbabawas ng karalitaan, konstruksyon ng imprastruktura, at paggamit ng yamang tubig, bagay na nakakapagbigay ng aktuwal na kapakanan sa kanilang mga mamamayan.
Salin: Lito
