Hinimok ng Tsina ang Amerika na sundin ang prinsipyong Isang Tsina at regulasyon ng Tatlong Magkasanib na Komunike ng Tsina at Amerika, agarang itigil ang pagpapataas ng aktuwal na relasyon ng Amerika at Taiwan, agarang itigil ang anumang pagpapalitang opisyal ng Amerika at Taiwan, at itigil ang pagtatahak sa maling landas.
Sa virtual forum na itinaguyod ng Heritage Foundation nitong Agosto 31, 2020, sinabi ni David R. Stilwell, Asistenteng Kalihim ng Estado ng Amerika, na nitong nakaraang 40 taong nakalipas, ang Amerika ay palagiang ginagabayan ng Taiwan Relations Act (TRA), Tatlong Magkasanib na Komunike ng Tsina at Amerika, at Six Assurances noong panahon ni Pangulong Ronald Wilson Reagan.
Ang mga aksyon ng Amerika kamakailan ay hindi pagbabago ng patakaran, sa halip, ito'y pagsasaayos sa loob ng framework ng patakarang Isang Tsina. Sinabi ni Stilwell na itinatatag ng Amerika ang bagong bilateral na diyalogo sa Taiwan na naglalayong palakasin ang relasyon nito sa Taiwan at suportahan ang Taiwan sa harap ng presyur mula sa Tsina.
Tinukoy ni Hua Chunying, Tagapagsalita ng Ministring Panlabas ng Tsina sa regular na preskon Setyembre 1, 2020 sa Beijing na ang patakarang Isang Tsina ay pundasyong pulitikal at pundamental na paunang kondisyon ng pagkakatatag at pagpapaunlad ng relasyong diplomatiko ng Tsina at Amerika. Ang TRA at Six Assurances na unilateral na itinakda ng Amerika ay malubhang lumabag sa patakarang Isang Tsina at Tatlong Magkasanib na Komunike ng Tsina at Amerika, lumabag din ito sa pundamental na prinsipyo ng relasyong pandaigdig, at naki-alam sa mga suliraning panloob ng Tsina, kaya komprehensibong pagkakamali at ilegal ang naturang dokumento, walang anumang bisa ang mga ito. Buong tatag na tinututulan ito ng pamahalang Tsino.
Salin:Sarah
