Gabi ng Musika ika-16 2012

April 15, 2012 (Sunday)

Magandang-magandang gabi. Ito ang inyong loving DJ para sa Gabi ng Musika atbp.

Kumusta na? Okey lang ba kayo riyan? Kung okey kayo riyan, okey din kami rito. At kung wala kayo riyan, wala rin kami rito. Kayo ang lifeblood ng CRI at Serbisyo Filipino. Iyon yun, eh.

Chinese Dumpling

May padalang postcard si Eloisa ng Finland. Sabi niya sa kanyang short note, lagi raw silang kumakain ng Chinese dumpling. Available na raw ito sa Asian market sa kanilang lugar sa Finland. Tapos, tinatanong niya kung araw-araw daw ay kumakain ng dumpling ang mga Chinese.

Salamat sa postcard, Eloisa.

Puwede rin naman nilang kainin iyang dumpling (o jiaozi sa Chinese) anytime of the day o any day of the week dahil makakabili o makakagawa naman sila niyan kung kailan nila gusto. Pero iyan ay espesyal na pagkain ng mga Chinese kung Chinese Lunar New Year. Kung hindi nawawala sa hapag-kainan natin ang Spaghetti, Letse Plan, Macaroni Salad, pan-Amerikano, keso at hamon, etc. kung Pasko at Bagong Taon, hindi rin nawawala sa hapag-kainan nila ang Jiaozi kung Chinese New Year.

Ang Jiaozi ay kinakain ng mga Chinese, lalo na ng mga taga-hilaga, sa dalawang kadahilanan: Una, ang bigkas ng salitang jiaozi sa Chinese ay nagpapahayag ng "pamamaalam sa lumang taon at pagtanggap sa bago"; ikalawa, ang Jiaozi ay may mapalad na hugis ng masa ng ginto ng sinaunang Tsina, at ang hugis na ito ay nangangahulugan ng "Hayaang pumasok sa bahay ang pera."

Pansit Palabok

Ang Jiaozi ay isinisilbi ng mga Chinese sa iba't ibang kaakit-akit na paraan. May mga nagpapalaman ng candy bilang pagbati ng Manigong Bagong Taon. Mayroon din namang nagpapalaman ng coin at sinuman ang mapalad na makakakuha nito ay makapagtatamasa ng buhay na mariwasa.

Bigyang-daan natin ang snail mail ni Vicky Santos ng Quinta Market / Quiapo, Manila. Sabi ng kanyang liham: "Dear Kuya Ramon, tama ang lagi mong sinasabing "Ang kabutihan ay ipinapasa, hindi ibinabalik." Lahat ng mabuting gawi sa akin ng mga kaibigan at kakilala, ginagawa ko rin sa iba at nagdodoble ang balik. Hindi lang sa akin, pati sa iba. Sensiya ka na, hindi na kita nabati. Hello, hello nga pala. Kumusta ang trabaho? Ang mapagmahal mong tinig ay umaalingawngaw sa aming palengke pagdating ng alas-siyete i-medya ng gabi. Hindi lang ako ang nakikinig ngayon sa iyo. Pati mga iba pang kaibigan kong may puwesto sa palengke dito sa Quiapo, nakikinig na rin. Natutuhan nila ang pakikinig dahil nahawa sa akin. Sabay-sabay kaming nakikinig ngayon tuwing alas-siyete i-medya ng gabi. Pero ako, talagang hindi uma-absent. Regular talaga. Maganda ang pakikitungo mo sa iyong mga tagapakinig kaya napapamahal ka sa kanila. Parang nagiging public service na rin ang programa mong Gabi ng Musika. Minsan, binasa mo ang sulat ng isang magulang na naghahanap ng anak sa Beijing. Alam ng magulang na nasa Beijing ang anak pero hindi niya alam kung saan nakatira at kung paano kokontakin sa phone. Ikaw ang gumawa ng paraan para magkausap ang magulang at anak. Parang pelikula ni Da King, ah, hehehe…Nitong nagdaang ilang araw, malinaw ang inyong signal at napakinggan kong lahat ang inyong mga programa na tulad ng Balita, Usap-usapan, Kaalaman sa Tsina, Pinoy sa Tsina at Pag-usapan Natin. Salamat nga pala doon sa mga padala mong babasahin at iyong mga iba pang alaala. Para sa akin, malaking bagay ang mga iyon. Hindi ako nakakalimot, ha, tuwing alas-siyete i-medya ng gabi...

Maraming salamat sa iyong sulat, Vicky, at maraming salamat din sa iba pang mga kaibigan diyan sa Quinta Market, na nakikinig sa aking programa. Gustung gusto ko ang inyong pansit palabok na may kasamang pandelemon.

Kayo ay nakikinig sa himpilang China Radio International at sa programang Gabi ng Musika atbp. ng Serbisyo Filipino. Ito si Ramon Jr., ang inyong loving, ever loving DJ.

YAKAP SA DILIM
(ORANGE AND LEMONS)

Narinig ninyo ang Orange and Lemons sa kanilang sariling version ng awiting "Yakap sa Dilim" na lifted sa collective album na may pamagat na "The Best of Apo Hiking Tribute."

Tunghayan naman natin ang e-mail ni Patricia Abad ng R. R. Landon Extension, Cebu City. Sabi niya: "Dear Kuya Ramon, kumusta kayo riyan? Kumusta ang board work ninyo? Lagi kitang pinakikinggan kung Friday, kasama si Kuya Rhio, at kung Sunday sa programang Gabi ng Musika. Sa 12.110 MgHz ako nakikinig. Ayos naman ang signal. Alam mo, Kuya, natutuwa ako pag pinag-uusapan ninyo ang mga relevant issues sa inyong Friday program. Natututo rin akong mag-isip at gumawa ng sarili kong opinion hinggil sa issue, at nakakapulot din ako ng mumunting kaalaman mula sa inyong talakayan. Sana magkaroon kami ng pagkakataon na maki-join sa inyong talakayan. Magiging mas exciting, di ba? Nalulungkot lang ako pag nagkakaroon ng balita hinggil sa South China Sea. Kelan kaya ito matatapos? Dapat siguro panghimasukan na ito ng ating mahal na Pangulo, tulad ng ginawa ng nakaraang administrasyon. Ano ba ang masasabi mo sa isyung ito? Mahilig din ako sa Chinese culture, kaya gusto ko rin ang inyong Kaalaman sa Tsina, Cooking Show at Chinese language lesson on air. Kaya lang, bihira ko nang marinig ang dalawang huli. Salamat sa mga padala mong bookmarks at stickers. Baka magpadala rin ako sa iyo ng ilang postcards. Hindi ko na pakakahabaan pa ito, Kuya, dahil alam kong abalang abala kayo riyan sa istasyon. Lagi mong aalagaan ang kalusugan mo. Iyan ang pinakamahalaga sa lahat. Salamat uli and God bless..."

Salamat din sa iyo, Patricia, at kumusta sa lahat ng mga kaibigan diyan sa R. R. Landon, ha?

Ngayon, alamin naman natin kung ano ang latest tsika mula sa ating reporter sa Maynila. Super DJ Happy, pasok!

Salamat, Super DJ!

WONDER OF XIN JIANG
(DAO LANG)

Dao Lang, sa awiting "Wonder of Xin Jiang" na hango sa album na may pamagat na "The First Snow in 2002."

Bigyang-daan naman natin ang ilang text messages.

Sabi ng 921 577 9195: "Hi, Kuya Ramon! Kumusta trabaho ninyo jan! Lagi kong naririnig programa niyong pag-usapan natin kung Friday. Parang habit na pakikinig ko dito."

Sabi naman ng 906 201 1704: "Gud PM, Kuya RJ! Natutuwa ako dahil very open na kayo ngayon lalo na sa inyong talk shows. Tinatalakay ninyo pati trial marriage ngayon. Maganda naman yun. Solved ako diyan."

Sabi naman ng 917 483 2281: "Kuya Ramon, malinaw signal ninyo dito sa lugar namin sa Lumban, Laguna. Napapakinggan ko mga balita ninyo araw-araw pati mga programang Pelikulang Tsino, Diretsahan, Pinoy sa Tsina at Pag-usapan Natin. Nasaan na ang Cooking Show ninyo?"

Sabi naman ng 928 001 45204: "Hello, Kuya RJ! Thanks sa Gabi ng Musika at sa pagbibigay ninyo ng importansiya sa aming mga tagapakinig."

Maraming-maraming salamat sa inyong mga mensaheng SMS.

At diyan sa puntong iyan nagtatapos ang edition sa araw na ito ng Gabi ng Musika atbp.

Para sa inyong mga reaction na may kinalaman sa programang ito o sa alinman sa mga programa ng Serbisyo Filipino, ang aming website ay filipino.cri.cn; ang e-mail, filipino_section@yahoo.com; ang facebook, crifilipinoservice@gmail.com; at ang telephone number (Buddy Smart) 0921 257 2397.

Itong muli si Ramon Jr. Maraming-maraming salamat sa inyong walang-sawang pakikinig. God bless.

>> Pasok sa Blog ni Kuya Ramon