Matapos masalanta ng bagyong Yolanda ang Tacloban, ipinamalas ng buong daigdig ang agarang pagdamay sa mga biktima ng super typhoon. Sa panahon ng matinding pangangailangan kusang loob na nag-abot ng tulong ang mga taga Shanghai. Ang mga Pilipino, kasama ang mga kaibigang Tsino at dayuhang naninirahan sa Shanghai ay aktibong lumahok sa iba't ibang mga charity events para mangalap ng donasyon para sa mga nasalanta ni Yolanda.
Ayon sa datos na ibinahagi ng Philippine Consulate General in Shanghai, umabot sa Php 2,700,000.00 ang nakalap na pondong ipinadala sa Pilipinas. Bilang pasasalamat sa lahat ng mga taga-Shanghai na walang pag-iimbot na tumulong sa mga Pilipinong biktima ng bagyong Yolanda, magkakasamang itinaguyod ng Philippine Soong Qing Ling Foundation, Philippine Consulate General at Filipino Community in Shanghai ang Voices of Gratitude.
Ang Voices of Gratitude ay isang konsiyerto na nagtampok sa sikat at premyadong Loboc Children's Choir.
Sa sampung taong pagkakawanggawa ni Michelle Teope-Shen, Pangulo ng Filipino Community in Shanghai, nasaksihan niya ang agaran, kusang-loob at malakihang mga charitable events para sa mga biktima ni Yolanda na pinangunahan ng mga Pinoy sa Shanghai at mga karatig lunsod.
Kinapanayam ng Mga Pinoy sa Tsina si Michelle Teope-Shen, Pangulo ng Filipino Community sa Shanghai at kanyang ibinahagi na isang buwan lang ang panahong iginugol ng working committee para isakatuparan ang konsiyerto. Ani Bb. Shen, kakaiba ang ipinamalas na pagkakaisa ng Filipino Community at sila ay nagkusang isagawa ang kani-kanilang mga charity events. Kaya't bilang sukli, naisip ng mga tagapag-organisang iparating ang taos-pusong pagkilala sa kabutihan at mapagkawang-gawang kalooban ng mga kaibigang Tsino, miyembro ng expat community at mga OFW.
Si Michelle Shen, kasama si Ambassador Carlos Chan, Chairman ng Philippine Soong Qing Ling Foundation at mga miyembro ng Loboc Children's Choir
Nakakabilib ang Loboc Children's Choir. Kanilang pinatunayan kung paano naging instrumento ang musika para isulong ang pagkakaibigan ng mga Pinoy at mga Tsino. Isang gabi ng musika, isang gabi ng kapatiran, isang gabi ng pakikipagkaibigan. Ito ang hangad ng Voices of Gratitude tribute concert. Nawa sa hinaharap maulit at mas dumami pa ang pagkakataon para magtulungan ang mga miyembro ng Chinese, Filipino at expat communities sa Shanghai.
Si Chen Yifei (kaliwa) kasama ang kanyang kaibigan at nanay nitong si Wang Xiaoyun (kanan)
Pakinggan ang buong panayam sa pamamagitan ng audio link sa itaas. Siguruhing gumagana ang latest version ng Flash Player para sa maalwang pakikinig. Para sa iba pang kwento ng OFWs dito sa Tsina punta na sa website na filipino.cri.cn. Mapapakinggan din ang programang ito sa iTunes Podcast, hanapin lang ang Kape't Tsaa. Para makuha ang updates ng mga programa i-Like ang Facebook page na CRI Filipino Service.
