|
||||||||
|
||
Magpapatuloy pa ang paglabas ng mga manggagawang Filipino patungo sa iba't ibang bansa kung walang makukuhang trabaho sa Pilipinas. Ito ang pahayag ni Fr. Edwin Corros, isang misyonerong pari na naglilingkod bilang Executive Secretary ng Episcopal Commission on Migrants and Itinerant People sa panayam na isinagawa ng CBCP Media Office para sa China Radio International – Filipino Section.
Ibinigay na halimbawa ni Fr. Edwin ang pagdami ng mga nagtapos ng Nursing at Education na walang makuhang trabaho sa mga ospital at mga paaralan sapagkat walang itinatayong mga pagamutan at mga paaralan ang pamahalaan at mga pribadong kumpanya. Ang masaklap pa nito, ani Fr. Edwin, ay tumatanggap na lamang sila ng mas mababang trabaho tulad ng pagiging domestic helper o caregiver kahit pa nakapagtapos sila ng kolehiyo.
Ikinabahala pa rin ni Fr. Edwin ang pagtaas ng bilang ng mga lumalabas ng bansa sa bawat araw sapagkat umabot na sa apat na libong Filipino ang lumalabas ng bansa ngayon. Noong nakalipas na mga tao'y umabot lamang tatlong libong Filipino ang nangingibang-bansa sa araw-araw.
Isang bagay na nakababahala sa ngayon ay ang pagtaas ng halaga ng piso sa palitan nito sa US dollar sapagkat sa pagbuhos ng foreign remittances, unti-unting nawawalan ng halaga ang dolyar kaya't kailangang magdagdag ng oras sa kanilang trabaho ang mga mangagawa upang madagdagan ang kanilang ipinadadalang salapi patungo sa Pilipinas.
Nais ni Fr. Edwin na magkaroon ng higit na aktibong mga embahadang dadalo sa mga pangangailangang konsular ng mga manggagawang nasa iba't ibang bansa.
© China Radio International.CRI. All Rights Reserved. 16A Shijingshan Road, Beijing, China. 100040 |