Matapos lumabas ang balitang tatlong Pilipino ang maaaring mabitay sa iba't ibang bahagi ng China dahilan sa drug-trafficking, lalong tumingkad ang pangangailangang palakasin ang mga Pre-Departure Orientation Seminars na ibinibigay sa mga manggawang Pilipinong nakatakdang lumabas ng bansa upang maghanapbuhay.
Ayon kay Edmund Ruga, program director ng Episcopal Commission on Migrant and Itinerant People, nanawagan sila sa pamahalaang tulungan ang mga Pilipinong nahaharap sa matitinding pagsubok tulad halimbawa ng mga usaping may kinalaman sa bawal na gamot.
Ayon kay Ginoong Ruga, nakalulungkot na mga overseas Filipino workers ang madalas masangkot sa pagdadala ng mga bawal na gamot sa iba't ibang bansa.
"Mayroong mahihigpit na batas na ipinatutupad ang iba't ibang bansa kaya't mas makabubuting malaman na ito ng mga paalis na manggagawa," sabi pa ni Ruga.
Kung magkakaroon ng sapat na kaalaman ang mga Pilipinong umaalis ng bansa, hindi sana napahamak ang tatlong nadakip na Pilipino noong 2008.
Sa panig naman ni Senador Loren Legarda, Chairperson ng Senate Committee on Foreign Relations, marapat lamang na gawin ng Department of Foreign Affairs ang lahat upang mailigtas ang mga Pilipino sa tiyak na kamatayan at mahatulan na lamang ng pagkakabilanggo ng habang-buhay o mas mababa pang kaparusahan.
Sa isang kalatas, sinabi rin Senador Legarda na kailangang higpitan pa ang batas na nagbabawal sa human trafficking lalo't higit ang pagpapataw ng mas mabibigat na kaparusahan sa mga banyagang aabuso sa mga Pilipino at Pilipina sa pamamagitan ng pagpapadala ng mga bawal na gamot sa iba't ibang bansa.
Isang halimbawa na ang kaso ni Sally Ordinario Villanueva na pinag-utusang magdala ng bagahe sa kanyang magiging bagong amo papasok sa China. Magugunitang isa sa mga bansang nakapahigpit sa paglaban sa illegal na droga ay ang China.
Ito si Melo Acuna, mula sa CBCP Media Office at nag-uulat sa China Radio International – Filipino Section.
