|
||||||||
|
||
Mula sa Maynila, nakatakdang umalis sa Biyernes si Pangalawang Pangulo Jejomar C. Binay tungo sa isang linggong paglalakbay sa tatlong bansa sa Gitnang Silangan.
Ayon sa kanyang tagapagsalita na si Joey Salgado, dadalaw si Ginoong Binay sa Kuwait, Riyadh sa Saudi Arabia at maging sa Abu Dhabi at Dubai sa United Arab Emirates. Pinag-utusan siya ni Pangulong Benigno Smeon Cojuangco Aquino III na alamin ang kalagayan ng mga manggagawang Pilipino doon.
Sinabi ni Ginoong Binay na kakausapin niya ang iba't ibang mga pinuno ng bansang kanyang dadalawin upang mabatid kung ano ang tunay na kalagayan ng mga manggagawa. Layunin din niyang magkaroon ng bilateral discussions upang maisaayos ang mga kasunduang gagarantiya sa kapakanan ng mga manggagawang Pinoy.
Tiniyak din ni Ginoong Binay ang pakikipagtulungan ng kanyang tanggapan sa Department of Foreign Affairs at mga embahada sa Gitnang Silangan upang makatugon sa anumang pangangailangan ng mga manggagawang aabot sa ilang daang libong kalalakiha't kababaihan.
Nais din niyang malaman kung anu-anong uri ng tulong ang naiparating na nila sa mga manggagawang may iba;t ibang suliranin sa Gitnang Silangan. May mga takdang pagdalaw din siya sa mga welfare centers at job sites ng mga Pinoy.
Dadalaw siya sa Kuwait nang napapanahon sa Kuwait National Day, bilang opisyal na kinatawan ni Pangulong Benigno Simeon C. Aquino III.
Ayon sa datos ng Kagawaran ng Paggawa, pinakamaraming mga Pilipinong manggagawa sa Gitnang Silangan.
Samantala, nanawagan din ang mga kamag-anak ng iba pang mga Pilipinong napipiit sa iba't ibang bansa tulad ng China. May ilang daang Pilipino rin ang nadakip sa pagpupuslit ng bawal na gamot sa iba't ibang paliparan sa iba't ibang bansa. Nanawagan silang pakinggan din ang kanilang mga mahal sa buhay na nalinlang lamang ng mga sindikato.
Ito si Melo M. Acuna mula sa CBCP Media Office, nag-uulat para sa China Radio International – Filipino Section.
© China Radio International.CRI. All Rights Reserved. 16A Shijingshan Road, Beijing, China. 100040 |