|
||||||||
|
||
Samantalang nagdiriwang ang mga namuno sa EDSA People Power 1 dalawampu't limang taon na ang nakararaan, humingi naman ng panalangin si Pangalawang Pangulo Jejomar C. Binay sa mga Pilipino na manatiling ligtas ang mga libu-libong manggagawang Pinoy sa Bahrain, Libya at Yemen na kasalukuyang may kaguluhan.
Sinabi naman ni Pangulong Benigno Simeon C. Aquino III na ang maayos na pamamalakad ng pamahalaan at masinop ng paggastos ng salapi ng bayan ang mahalaga sa pagpapanatili ng pagkakaisa ng mga mamamayan.
Ito ang buod ng kanyang talumpati sa pagtataas ng bandila sa EDSA People Power Monument sa Quezon City kaninang umaga.
Mapalalakas ang Demokrasya kung mapalalakas pa ng pamahalaan ang pagtitiwala ng taongbayan sa pamahalaan. Ito ang pagpapakita na buhay na buhay pa ang diwa ng EDSA na siyang nagluklok sa kanyang ina na si Pangulong Corazon Cojuangco Aquino noong 1986.
Kaninang umaga'y inalis na ang lambong na bumabalot sa bantayog ni Jaime Lachica Cardinal Sin, ang pangatlong Cardinal ng Pilipinas, na may dugong Chino. Si Cardinal Sin ang isa sa mga nanawagan sa mga mamamayan upang tulungan sina dating Defense Minister Juan Ponce-Enrile at Lt. General Fidel V. Ramos noong sila'y mag-aklas laban sa noo'y Pangulong Ferdinand Edralin Marcos may dalawampu't limang taon na ang nakalilipas.
Sa kanyang mensahe, sinabi ni Manila Archbishop Gaudencio Borbon Cardinal Rosales angkop ang pagkakatayo ng bantayog na nagpaparangal kay Cardinal Sin sapagkat nasa panulukan ng mga lansangang ipinangalan sa dalawang iginagalang na bayani ng Republika ng Pilipinas na sina Gat Andres Bonifacio at Padre Jose Burgos.
Ayon sa Arsobispo ng Maynila, ipinagugunita lamang ng yumaong Cardinal Sin na magtatagumpay ang mga Pilipino laban sa diktadura at kawalan ng katarungan sa pamamagitan ng mapayapang paraan.
Idinagdag pa ni Cardinal Rosales na nasa sangangdaan ang mga Pilipino at malayang makapamimili ng daang nais tahakin – sa pagitan ng banal at 'di banal, sa pag-itan ng salapi at ng Diyos, at pag-itan ng mabuti at masama.
Sumakay ng Emirates Flight EK 333 patungo sa Gitnang Silangan upang alamin ang tunay na kalagayan ng mga manggagawang Pinoy doon. Umalis si Binay sa kautusan ni Pangulong Benigno Simeon Cojuangco Aquio III matapos magsunod-sunod ang pagsiklab ng pag-aaklas sa Gitnang Silangan.
Ayon sa pangalawang pangulo, ito ang pagkakataong maipakita ng pamahalaan ang pagkabalisa nito sa kalagayan ng mga manggagawa doon at nang makaharap na rin ang ilang mga opisyal ng Embahada ng Pilipinas sa Kuwait, Saudi Arabia at Abu Dhabi.
Ito si Melo Acuna mula sa CBCP Media Office nag-uulat para sa China Radio International Filipino Section.
© China Radio International.CRI. All Rights Reserved. 16A Shijingshan Road, Beijing, China. 100040 |