Isang senador ang nagsabing naiiwanan na ang Pilipinas kung "renewable energy" ang pag-uusapan dahilan sa kawalan ng suporta sa industriya.
Ayon kay Senador Edgardo J. Angara, dating pangulo ng senado at pangulo ng Pamantasan ng Pilipinas, ang "Feed In Tariff (FIT)" rates ay kailangang isaayos upang maisulong ang paggamit ng renewable energy upang huwag nang maiwanan at sa halip ay maging agresibo upang makasama ang renewable energy systems sa energy mix ng bansa.
Si Angara ang pinuno ng Congressional Commission on Science Technology and Engineering. Ayon sa mambabatas, ang renewable energy tulad ng nagmumula sa hangin, init ng araw at biomass ang may kakayahang makabuo ng luntiang enerhiya na siyang makababawas sa pag-asa sa langis na mula sa ibang bansa sapagkat makapagdudulot din ito ng panibagong hanapbuhay sa mga mamamayan.
Nabili na kasi ng Ayala Group of Companies ang limampung porsiyentong bahagi ng kumpanyang may-ari ng 33 megawatt na wind farm sa Bangui Bay, sinabi ni Angara na ang pribadong sektor na nakakakita ng mas magandang kunabukasan sa renewable energy. Dito kailangan ang suporta ng pamahalaan.
Ang mga kumpanyang tulad ng San Miguel Corporation, Lopez Group at ang Abotiz Group of Companies ay mayroon nang mga investment sa Renewable Energy.
Ang Lopez Group ang nakabili ng Energy Development Corporation na gumagamit ng geothermal energy sa pagpapatakbo ng mga turbina upang magkaroon ng kuryente mula sa hangganan ng Albay at Sorsogon, Leyte, Bacolod at Dumaguete sa Negros Island at sa Mt. Apo sa Mindanao.
