Child labor, problema pa rin sa Pilipinas

NADARAMA pa rin ang suliraning dala ng pagkakaroon ng mga batang kalahok sa bilang ng mga manggagawa kahit pa marapat na nasa paaralan sila. Ito ang lumabas sa pag-aaral na ginawa ng International Labor Organization sa ilang bahagi ng Pilipinas.

Ayon sa pagsusuri, ang pinakamalupit na uri ng "child labor" ay kinabibilangan ng pag-alipin o kahalintulad na gawain ng mga alipin, "commercial sexual exploitation," mga gawaing labag sa batas at mga mapapanganib na uri ng hanapbuhay ayon sa binabanggit ng International Labor Organization Convention No. 182.

Layunin ng pag-aaral na mawala nang tuluyan ang "child labour" sa buong daigdig lalo't ipinagbabawal ito sa Pilipinas ayon sa Republic Act 9231 na ipinasa noong Disyembre 2003.

Ayon sa 2010 Labour Force Survey, umaabot sa 2.4 milyong kabataan ang naghahanapbuhay sa Pilipinas.

Apat na iba't ibang lalawigan ang sinuri ng International Labour Organization kabilang na ang mga "menor de edad" na manggagawa sa Lucena City at mga bayan ng Calauag at Catanauan na umaabot sa isang libo, apatnaraa't limampu't tatlo na sangkot sa pagtitinda, gawaing bahay at pamumulot ng basura. Halos kalahati sa kanila ang 'di na pumapasok sa paaralan sapagkat nais na nilang suportahan ang kanilang mga pamilya samantalang higit sa tatlumpung porsiyento naman ang walang kakayahang pumasok sa paaralan.

Sa Bukidnon, sinuri ang kalagayan ng mga kabataan sa Malaybalay at Valencia Cities at mga bayan ng Maramag at Quezon. Isang libo't animnaraa't tatlumpu't dalawang kabataang manggagawa ang nasa pagsasaka sa mga tubuhan at ibang bukirin, mga 24% naman ang mga nasa maisan at 12 porsiyento naman ang nasa gawaing bahay. Pitumpung porsiyento naman ang kailangang sumuporta sa kanilang mga pamilya at 23% naman ang hindi kayang mag-aral sa mga paaralan ng pamahalaan.

Tatlumpu't anim na porsiyento naman ng may apat na libo, isang daa't labing isang manggagawang kabataan ang nasa pangingisda, may 20% ang nasa "informal sales" at 14% ang nasa gawaing bahay.

Sa Hilagang Samar naman, mula sa isang libo, limangdaa't walumpu't siyam na mga manggagawang kabataan, 34% ang nasa "informal sales," 15% ang nasa gawaing bahay at 9% naman ang nasa mga palayan.

Pagtatangkaan ng mga kawani ng Kagawaran ng Edukasyon at mga pamahalaang-lokal na magkaroon ng "mobile teachers" na magtuturo sa mga kabataan sa malalayong pook upang maturuan ang mga kabataang tumitigil ng pag-aaral sa bawat pagdating ng anihan.

Sa Bukidnon, sasanayin ng Department of Education samantalang tutustusan ng "local government units" ang sahod ng mga guro samantalang ang Sugar Industry Foundation, Inc. ay maglalaan ng mga gusaling paaralan sa isang barangay para sa mga katutubo.

Layunin ng proyektong maalis ang may limang libo, limang daang mga kabataan, maiwasan ang pagpasok sa "work force" ng may higit sa tatlong libo't tatlong daan at maipagtanggol ang may limang daan sa kanila sa pamamagitan ng edukasyon, programang pangkalusugan, psychosolcial programs at legal assistance kasama na rin ang pagtugon sa kahirapan sa pamamagitan ng sinasabing "Local Economic Development" ng iba't ibang komunidad na kinatatagpuan ng "child labor."