ANG FIGARO COFFEE COMPANY, naitatag noong 1993 dito sa Pilipinas ay lalahok sa nalalapit na China Franchise Expo 2011 mula sa Sabado, Mayo a-siyete hanggang Lunes, Mayo a-nuwebe sa China National Convention Center sa Beijing.
Pinamumunuan ni Mike T. Barret, ang Figaro Coffee Company franchise manager, ang walo-kataong delegasyon. Ang kumpanya, sa nakalipas na 17 taon sa industriya ng kape ay mayroon ng mga animnapung kapihan sa iba't ibang bahagi ng bansa.
Nagbukas na sila ng unang kapihan sa lalawigan ng Wuhan noong buwan ng Enero taong ito at magbubukas ng apat pang mga kapihan sa lalawigan ng Hubei, China.
Magtatayo din ang Figaro Coffee Company ng mga kapihan sa Saudi Arabia at Papua New Guinea ngayong taon samantalang may mga pag-uusap na sa pagitan ng kumpanya at mga mangangalakal mula Singapore at United Arab Emirates.
ANG barkong sinasakyan ng dalawampu't apat na mgdaragat na Pilipino ay pinalaya na ng mga pirata sa Somalia noong nakalipas na Sabado.
Ayon sa Department of Foreign Affairs, ang MV Renuar, ang barkong rehistrado sa Panama at pag-aari ng kumpanyang may tanggapan sa Liberia, ay biminbin ng mga pirata noong a-onse ng Disyembre sa Indian Ocean samantalang naglalayag may isang libo't limampung nautical miles sa silangan ng Somalia o limang-daa't limampung nautical miles sa kanluran ng India.
Patungo sana ang barko sa United Arab Emirates mula sa Mauritius ng pasukin ng mga pirata.
Mayroon pang 79 na magdaragat na Pinoy, sakay ng siyam na barko, ang napipiit ng mga pirata sa Somalia. Inaabangan na lamang ang pagbabalik sa bansa ng mga tripulanteng Pinoy.
Aabot sa 300,000 magdaragat na Pinoy ang kawani ng iba't ibang shipping companies sa buong daigdig.
