NANINIWALA ang isang mambabatas na makatutulong din sa bansa ang pag-uwi ng mga manggagawang Pilipino mula sa ibang bansa at marapat lamang suportahan ang palatuntunan ng Department of Labor and Employment upang makahinga ng maluwag ang naghihingalong "Science and Technology sector" sa bansa.
Ayon kay Senador Edgardo J. Angara, suportado niya ang "brain gain project" sapagkat sa dami na lamang ng mga banyagang kumpanyang naghahanap ng mga mangagawang Pinoy ay pagpapakita na ng masamang epekto sa Pilipinas sa patuloy na pagbaba ng bilang ng mga dalubhasa sa larangan ng agham at teknolohiya.
Si Ginoong Angara na naging pangulo ng Pamantasan ng Pilipinas at pinuno ng Senate Committee on Higher Education ay nagsabing hindi masisisi ang mga Pinoy na manggagamot, enhinyero at mga siyentipiko na mabighani patungo sa ibang bansa dahilan sa sahod na iniaalok.
Subalit sa pamamagitan ng palatuntunang pinangalanang "Balik-Trabaho sa Pinas," matatanggap ang mga umuuwing OFW at mabibigyan ng maayos na hanapbuhay mismo sa Pilipinas.
Kung matatapatan lamang ng Pilipinas ang alok na sahod ng ibang bansa, marahil ay hindi na iiwanan pa ng mga dalubhasang Pilipino ang kanilang pamilya. Nadagdagan umano ng 148% ang bilang ng mga dalubhasang manggagawa sa agham at teknolohiya na umalis ng bansa sa nakalipas na sampung taon.
