Mga manggagawang Pilipino, pinaalalahanan na naman

NANAWAGAN na naman ang Kagawaran ng Ugnayang Panglabas ang mga mamamayan na huwag na huwag tatanggap ng anumang padala mula sa sinuman lalo pa't droga ang ilalakip sa kanilang mga bagahe sapagkat mabibigat na parusa ang naghihintay sa kanila.

Ito ang inilabas na paala-ala ng kagawaran matapos mag-ulat ang Philippine Consulate General sa Shanghai na dalawang Pilipinong una nang pinatawan ng parusang kamatayan na mayroong dalawang taong "reprieve" ang nakatanggap ng "commutation" at naging pagkakabilanggong habang-buhay na lamang sa desisyon ng Hangzhou Intermediate People's Court dahilan sa kanilang kabutihan sa loob ng bilangguan.

Ang dalawang Pilipino, isang babae't isang lalaki, ay nadakip sa Hangzhou, China noong a-25 at a-27 ng Oktubre noong taong 2008. May dala silang isang libo, dalawang-daang gramo ng heroina sa kanilang mga bagahe.

Sa ilalim ng criminal law ng Tsina, ang sinumang madadakpan ng higit sa 50 gramo ng illegal drugs ay maaaring mahatulan ng kamatayan sa oras na mapatunayang nagkasala.

Ang gobyerno Pilipino ay mayroong malakas na anti-drug policy at nakikipagtulungan sa iba't ibang tanggapan ng mga autoridad sa iba't ibang bansa upang masugpo ang drug trafficking.

LABINGPITONG mga brodkaster mula sa iba't ibang bahagi ng Pilipinas ang nakatakdang dumalaw sa Tsina sa ilalim ng State Administration for Radio, Television and Film at Kapisanan ng mga Brodkaster ng Pilipinas Exchange Visit program mula sa Miyerkoles, Agosto 24 hanggang Martes, Agosto 30.

Pamumunuan ni KBP President and Mrs. Herman Z. Basbano ang grupo at makakasama sina George Salabao, president ng St. Jude Thaddeus Institute of Technology, Ric Climaco ng Notre Dame Broadcasting Corporation, Alberto Sikat, vice president for radio ng KBP, Joselito Yabut, Corporate Secretary ng KBP, Eduardo Roxas ng Primax Broadcasting Network, Eliseo Manlangit ng Notre Dame Broadcasting Corporation, Maximo Tutor ng Agusan Communication Foundation, Cristina Esperanza Honrado ng Ad Standards Council at pitong iba pa.

Ito ang ikalawang pagdalaw ni Ginoong Basbano at ng kanyang maybahay na si Josefina sa Beijing at sa mga kalapit na pook.

Mahigit na sa dalawang dekada ang pagpapalitan ng pagdalaw ng mga broadcast journalist ng Tsina at Pilipinas na nagpalawak sa pag-unawa sa kultura, kasaysayan at pagkakaibigan ng dalawang bansa.