Pamahalaang Pilipino, nanawagan sa Syria; salaping kailangan para sa flood control, ipinalabas na

NANAWAGAN si Foreign Affairs Secretary Albert F. Del Rosario sa pamahalaan ng Syria dahilan sa kaguluhang nagaganap doon. Nanawagan ang kalihim sa mga pinuno ng Syria na gawin ang lahat upang matiyak ang kaligtasan ng mga mamamayang taga-Syria at mga banyagang naroroon.

Ayon kay Kalihim Del Rosario, nananawagan sila sa pamahalaan ng Syria na tugunan ang mga pangangailangan ng mga mamamayan nila at magpatupad ng mga ipinangakong reporma sa pinakamadaling panahon.

SAMANTALA, inilabas na ng Department of Budget and Management ngayong buwang ito sa Department of Public Works and Highways ang halagang P 1.34 bilyon upang masimulan ang iba't ibang flood control projects sa buong bansa.

Ayon kay Kalihim Florencio B. Abad, umabot na sa total na P 5.16 bilyon ang nailabas ng kanyang tanggapan para sa flood control projects sa taong ito.

Makababawas sa mga pagbaha ang gagawing mga proyekto at maiiwasan ang peligro sa mga naglalakad, mga motorista at mga ari-arian ng pamahalaan at ng mga pribadong mamamayan. Mas madadali ang paglalakbay ng mga tao, mga paninda at mga serbisyo na higit na magpapasigla sa mga pook na pagtatayuan ng mga proyektong ito.

Pinakamalaking alokasyon ang ibinigay sa Region IV-A CALABARZON na nagkakahalaga ng P 464.21 milyon at pumangalawa naman ang Region V BICOL na nagkahalaga ng P 307 milyon.

MULA SA Cotabato City, nakaligtas si Maguindanao Governor Esmael Toto Mangudadatu sa isang pagpapasabog sa tabing-daan na ikinasawi ng isa katao at ikinasugat ng pitong iba pa, kabilang ang isang provincial board member samantalang patungo sa isang resort para ipagdiwang ang ika-43ng kaarawan ng gobernador sa Tacurong City sa Sultan Kudarat province. Naganap ang pangbobomba mga alas tres y medya ng hapon.

Ayon sa mga balita sa media, sinabi ng gobernador na malakas ang bomba na inilaan para sa kanya samantalang sakay sa kanyang bullet-proof van. Malayu-layo pa ang kanyang sinasakyan ng sumabog ang bomba.

Magugunitang matinding kalaban sa politika ng mga Mangudadatu ang mga Ampatuan na nagmula sa Maguindanao.