|
||||||||
|
||
Mula sa Cambridge, Massachusetts, sinabi ni Vice President Jejomar C. Binay na malayong maganap ang armadong paglalaban ng mga Pilipino at Tsino hinggil sa isyu ng Spratlys. Bagaman, sinabi ng pangalawang pangulo na kailangang magkaroon ng "upgrading" ang kasunduang pangseguridad ng Pilipinas at Estados Unidos samantalang nanawagan sa Tsina na manatiling isang positibong puwersa tungo sa kapayapaan at kaunlaran sa Asia.
Sinabi ng pangalawang pangulo sa mga nangungunang defense at security officials mula sa 23 mga bansang nagsasama-sama sa Harvard University Kennedy School na kahit pa hindi obligado ang America na pumanig sa Pilipinas kung magkaroon ng sigalot sa pag-itan ng Pilipinas at Tsina, may pananagutan ang Estados Unidos sa ilalim ng 1951 Mutual Defense Treaty na tulungan at ipagtanggol ang Pilipinas kung ang mga kawal, mga pampasaherong barko at eroplano ay sasalakayin sa mga pook na ito.
Binigyang-diin ni Ginoong Binay na kahit pa hindi siya naniniwala na magkakaroon ng komprontasyon sa pag-itan ng dalawang bansa, makabubuting mapaghandaan ang lahat ng maaaring maganap.
Dapat umanong sumuporta ang mga bansa sa Timog Silangang Asia na magkaroon ng "balance of power" sa rehiyon kung saan susuporta ang Tsina sa kapayapaan at kaunlaran.
Nasa ilalim ng dalawang linggong palatuntunan si Pangalawang Pangulong Binay sa national at international security.
Sa kanyang isang oras na lecture tungkol sa Southeast Asian security, sinabi ni Ginoong Binay na kailangang harapin ng mga bansa sa timog silangang Asia ang China nang magkakasama upang magkaroon ng mga konkretong hakbang tungo sa kapayapaan.
Kahit pa umano nangkaroon ng mga maaaanghang na salita kamakailan, tuloy naman ang pag-uusap ng magkabilang panig.
Ani Ginoong Binay, dadalaw pa si Pangulong Beningo Simeon Aquino sa Tsina sa darating na linggo.
SAMANTALA, makakapanayam ng mga mamamahayag mula sa Tsina si Pangulong Benigno Simeon C. Aquino III sa kanyang tanggapan sa Malacanang. Kabilang sa mga makakadaupang palad ni Pangulong Aquino si Xian Jie ng China Radio International-Filipino Section.
Kabilang sa mga pagkasang pag-uusapan ang mga pananaw ni Pangulong Aquino sa relasyong namamagitan sa Tsina at Pilipinas, mga kasunduang magpapalakas sa pagtutulungan at pagkakaibigan ng dalawang bansa.
Sasamahan si Pangulong Aquino ng may 500 mga mangangalakal mula sa mga nangungunang mga kumpanya sa Pilipinas.
© China Radio International.CRI. All Rights Reserved. 16A Shijingshan Road, Beijing, China. 100040 |