Tensyon sa pagitan ng Tsina at Pilipinas, huhupa na

Sinabi ni Defense Secretary Voltaire Gazmin na umaasa siyang magpapatuloy nang humupa at huhupa ang tension sa pag-itan ng Tsina at Pilipinas kasunod ng limang araw na state visit ni Pangulong Aquino sa Tsina noong nakalipas na linggo.

Magugunitang lumagda sa isang joint statement sina Pangulong Aquino at Pangulong Hu Jintao na nangangakong isusulong ang mapayapang pag-uusap upang matugunan ang hindi pagkakaunawaan tungkol sa South China Sea.

Ani ni Ginoong Gazmin, sa pagkakaroon ng ganitong pahayag, humupa na ang tension sa pagitan ng dalawang bansa.

Ito ang pahayag ni Kalihim Gazmin sa isang chance interview kaninang umaga. Umaasa rin siya na nagkaroon ng goodwill sa pagdalaw ng Pangulong Aquino sa Tsina noong nakalipas na linggo.

Darating na sa mga susunod na araw ang negosyador na nagmula sa Malaysia upang tumulong sa pamahalaan sa pakikipag-usap nito sa Moro Islamic Liberation Front. Ito ang pinakahuling balita mula sa Malacanang.

Ayon kay Presidential Communications Development and Strategic Planning Office Secretary Ramon Carandang, umaasa silang sa pagdating ng negosyador mula sa Malaysia ay malulutas ang mga 'di pagkakaunawaan at magbabalik ang magkabilang panig sa negotiating table.

Samantalang naibigay na ng pamahalaan ang kanilang proposal sa MILF, sinabi ng MILF panel na pinayuhan na nila ang Central Committee na huwag na huwag itong tanggapin.

Kahit pa umano ganito ang situwasyon, magpapatuloy pa rin ang pamahalaan sa pagsusulong ng peace process.

Niliwanag ni Ginoong Carandang na hindi agad malulutas ang mga isyung ito sa madaliang panahon o ng isang pagpupulong at naniniwala siya isang matagal na proseso ang kailangan. Ang mahalaga, ayon kay Ginoong Carandang ay desidido ang magkabilang panig na isulong ang peace talks.

Noong nakalipas na buwan, nakausap ni Pangulong Aquino si MILF Chairman Al Haj Murad Ebrahim sa Tokyo bilang pagpapakita ng katapatan ng pamahalaang maisulong ang kapayapaan sa Mindanao.