Pangalawang Pangulong Binay, nagpasalamat sa desisyon ng hukuman hinggil sa mga manggagawang Pinoy

NAGPASALAMAT si Pangalawang Pangulong Jejomar C. Binay na siya ring Presidential Adviser on Overseas Filipino Workers Concerns sa desisyon ng isang hukuman sa Hong Kong na kumikilala sa karapatan ng isang manggagawang banyagang maging isang permanent resident ng lungsod.

"Ang desisyong ito'y isang hakbang sa pagkilala ng mga karapatan ng mga migrante. Nakatulong din naman ang mga manggagawang mula sa ibang bansa sa ekomoniya ng kanilang bansang pinaglilingkuran at ang desisyong ito'y kumikilala sa kanilang mga nai-ambag," sabi ni Ginoong Binay.

Nagdesisyon si Judge Johnson Lam Man-hon na pumabor kay Evangeline Banao Vallejos at nagsabing ang ordinansa na humahadlang sa mga banyagang domestic workers na magkaroon ng permanent residency sa Hong Kong ay taliwas sa kanilang Saligang Batas.

Naglingkod na si Vallejos sa Hong Kong mula pa noong 1986 bilang isang kasambahay at nag-file ng application for residency noong 2008. Kung siya ay ibang foreign worker tulad ng banker, abogado o guro, automatiko niyang matatanggap ang permanent residency sa loob ng pitong taon. Subalit nagpasa ng ibang ordinansa ang Hong Kong at nagsabing hindi kasama sa biyayang ito ang mga domestic workers.

Ang permanent residency sa Hong Kong ay nangangahulugan na ang isang tao ay maaaring magtagal sa pook ng hanggang gusto niya at hindi maaaring ipatapon ayon sa Saligang Batas. May karapatan na rin silang bumuto at kumandidato.

Ang itinakdang minimum wage para sa domestic helpers at $ 3,470 HK o aabot sa US $ 480 kabilang na ang room and board.

Ayon sa mga human rights advocates ang desisyong papabor kay Vallejos ang unang hakbang upang buwagin ang kalakarang nagmamaliit sa mga domestic workers. Maaring umabot sa 270,000 mga domestic helpers ang magkaroon ng karapatang mag-apply para sa permanent residency.