|
||||||||
|
||
LABING-TATLONG Tsinong turista at isang Filipino ang nasugatan matapos masangkot sa isang sakuna ang bus na kanilang sinasakyan sa lalawigan ng Aklan kaninang umaga.
Ayon sa pulisya, ang mga biktima'y sakay ng isang Island Tour bus na nakabangga ng isang trak sa barangay Habanais sa bayan ng Nabas, mga alas seis y media ng umaga.
Ang mga nasugatan ay dinala sa Baptist Hospital sa Caticlan, sa bayan ng Malay.
Sa panayam ng CRI Filipino Section, sinabi ni PNP Region VII Director Chief Supt. Cipriano Querol na kadarating pa lamang ng mga turista mula sa ibang bansa at patungo sa Boracay nang maganap ang sakuna.
Pawang "minor injuries" lamang naman ang natamo ng mga biktima, dagdag pa ni General Querol.
MGA TSINOY, NAG-AMBAG NG P 20 MILYON PARA SA RELIEF PROGRAM
NAGPASALAMAT ang Malacanang sa donasyon ng Federation of Filipino-Chinese Chambers of Commerce and Industry na nakadagdag sa salaping inilaan ng pamahalaan para sa rehabilitation at reconstruction efforts ng Department of Social Welfare and Development sa mga pook na tinamaan na magkakasunod na bagyo.
Sinabi ni Presidential Spokesman Edwin Lacierda na ang donasyon ay iniabot ng mga opisyal ng Federation of Filipino-Chinese Chambers of Commerce and Industry sa pamumuno ng pangulo nitong si Ginoong Tan Ching kay Pangulong Aquino nang dumalaw ang lupon ng mga pinuno ng samahan sa Malacanang kaninang umaga.
Sumaksi sa simpleng seremonya si Social Welfare and Development Secretary Corazon Juliano Soliman, Secretary Lacierda at iba pang pinuno ng pederasyon.
Iniabot din ni Pangulong Aquino ang tseke kay Kalihim Soliman para sa relief, rehabilitation at assistance sa mga naging biktima.
PILIPINAS, HANDANG HUMARAP SA KRISIS
TINIYAK ni Pangulong Benigno Simeon C. Aquino III sa mga mangangalakal at mga mamamayan ng bansa na handa ang kanyang administrasyong harapin ang krisis na nadarama sa iba't ibang bahagi ng daigdig.
Pruweba umano nito ang kanyang inilunsad na P 72 bilyong pisong magpapasigla sa ekonomiya ng bansa sa pamamagitan ng mga pagawaing bayan at poverty alleviation projects dahilan umano sa pagiging masinop ng kanyang pamamahala sa nakalipas na 15 buwan.
Sa kanyang talumpati sa ika-37 Business Congress at Exposition ng Philippine Chamber of Commerce and Industry kagabi, sinabi ni Ginoong Aquino na natural na mangamba ang marami subalit handa umano ang kanyang administrasyon sa pagtugon sa mga pangangailangan ng panahon.
Madarama umano kaagad ng mga mamamayan ang salaping papasok sa ekonomiya.
© China Radio International.CRI. All Rights Reserved. 16A Shijingshan Road, Beijing, China. 100040 |