|
||||||||
|
||
HINDI na magpapadala ng mga manggagawa ang Pilipinas sa 41 bansa at mga teritoryo dahilan sa hindi pagbibigay ng angkop na programa upang maipagsanggalang ang mga Pilipino laban sa mga pag-abuso.
Ito ang ipinalabas na resolusyon ng Department of Labor and Employment na inilagay sa kanilang website at nagsabing ang mga bansang ito ay hindi nakalagda sa international conventions na nagbibigay ng proteksyon sa mga manggagawang mula pa sa ibang bansa tulad ng Pilipinas.
Ni wala ring nilagdaang kasunduan ang mga bansang ito sa Pilipinas tungkol sa paggagarantiya ng mga karapatan ng mga manggagawang mula sa ating bansa, ayon sa resolusyon.
Wala rin silang mga batas na nagbibigay ng proteksyon sa mga banyagang manggagawa. Kabilang sa mga bansang nasa blacklist ay ang Afghanistan, Libya, Iraq, Sudan, Chad at Pakistan.
Walang balita kung ano ang magiging epekto nito sa ekonomiya ng bansa. Aabot sa siyam na milyong Pilipino ang naghahanapbuhay sa ibang bansa. Karamihan sa kanila ay mga kasambahay, manggagawa at magdaragat na karaniwang nagiging biktima ng mga pag-abuso. Marami ring mga Pilipino ang may mataas na posisyon sa mga bansang nasa Europa at America.
Ang mga ipinadadalang salapi ng mga manggagawa mula sa ibang bansa ang siyang nagpapalutang sa ekonomiya ng Pilipinas bagama't karaniwan na ang balitang mga pag-abuso ng employers.
Kahit na mayroong mga pagbabawal, marami pa rin ang nakararating sa magugulong bansa sa pamamagitan ng mga illegal na paraan at minamabuti na nila ito kaysa magkamit ng trabahong mababa ang sahod sa Pilipinas.
© China Radio International.CRI. All Rights Reserved. 16A Shijingshan Road, Beijing, China. 100040 |